संजय जाधव, बुलढाणा

शेतकऱ्यांना सरसकट कर्जमुक्ती द्यावी या प्रमुख मागणीसाठी बुलढाणा येथील घरासमोर रविकांत तुपकर यांनी अन्नत्याग आंदोलन सुरू केले आहे. रविकांत तुपकर यांच्या अन्नत्याग आंदोलनाचा आज तिसरा दिवस असून त्यांच्या आंदोलनाला राज्यभरातून मोठा प्रतिसाद मिळत आहे. मात्र आंदोलनाच्या तिसऱ्या दिवशीही प्रशासनाकडून कोणतीही ठोस दखल घेतली नसल्याने शेतकरी आणि तुपकर समर्थकांमध्ये संतापाची भावना वाढत आहे.

सरकारने जाहीर केलेली कर्जमाफी ही फसवी असल्याचा आरोप रविकांत तुपकर यांनी केला आहे. शासनाच्या जाचक अटींमुळे अनेक पात्र शेतकरी कर्जमुक्तीपासून वंचित राहतील, त्यामुळे सर्व शेतकऱ्यांना कोणत्याही अटींशिवाय सरसकट कर्जमाफी देण्यात यावी, अशी त्यांची मागणी आहे. या मागणीसाठी त्यांनी बेमुदत अन्नत्याग आंदोलनाचा मार्ग स्वीकारला आहे. तुपकर यांच्या आंदोलनाला विदर्भ आणि मराठवाड्यातील शेतकऱ्यांचा मोठा पाठिंबा मिळत आहे. आंदोलनाच्या समर्थनार्थ अनेक ठिकाणी शेतकरी आणि कार्यकर्ते रस्त्यावर उतरले आहेत.

बुलढाणा-छत्रपती संभाजीनगर मार्गावरील धाड येथे कार्यकर्त्यांनी टायर पेटवून रास्ता रोको आंदोलन केले. तसेच इतर भागांमध्येही तुपकर यांच्या समर्थनार्थ निदर्शने करण्यात येत असल्याचे चित्र पाहायला मिळत आहे. त्यामुळे आंदोलन अधिक तीव्र होत असल्याचे दिसून येत आहे. दरम्यान, शासनाकडे शेतकऱ्यांसाठी निधी नसल्याचा आरोप करत रविकांत तुपकर यांच्या पत्नी ॲडव्होकेट शर्वरी तुपकर यांनी अनोख्या पद्धतीने आंदोलन केले. त्यांनी असंख्य कार्यकर्त्यांसह बुलढाणा शहरात दिवसभर भीक मागून आंदोलन केले. या माध्यमातून जमा झालेली रक्कम जिल्हाधिकाऱ्यांकडे सुपूर्द करण्यात आली. या आंदोलनाची राज्यभरात मोठी चर्चा होत आहे.

अन्नत्याग आंदोलनाच्या तिसऱ्या दिवशी रविकांत तुपकर यांची प्रकृती खालावल्याची माहिती समोर आली आहे. शरीरातील साखरेचे प्रमाण कमी झाल्याने त्यांना अशक्तपणा जाणवत असून डॉक्टरांकडून त्यांच्या प्रकृतीवर लक्ष ठेवण्यात येत आहे. मात्र प्रकृती खालावत असतानाही तुपकर आपल्या भूमिकेवर ठाम आहेत. शेतकऱ्यांच्या प्रश्नांवर सरकारने तातडीने भूमिका स्पष्ट करावी आणि आंदोलनाची दखल घ्यावी, अशी मागणी आता शेतकरी संघटना आणि समर्थकांकडून केली जात आहे.