अमोल कलये, रत्नागिरी

रत्नागिरीतून मोठी बातमी समोर आली आहे. शहराजवळील कुवारबाव साईनगर परिसरात सात बंगल्याच्या मागील भागात एका तरुणावर कोयत्याने सपासप वार करून त्याची निर्घृण हत्या करण्यात आली. मृत तरुणाचे नाव सूरज राजाराम झोरे असे असून तो मूळचा संगमेश्वर तालुक्यातील रहिवासी होता. सध्या तो मुंबईत वास्तव्यास होता. याप्रकरणी पोलिसांनी तीन मारेकऱ्यांवर गुन्हा दाखल करण्यात आला असून पुढील तपास सुरु आहे.

मिळालेल्या माहितीनुसार, सूरज काही कामानिमित्त रत्नागिरीत आला होता. गुरुवार, २१ मे रोजी रात्री साडेनऊ ते अकराच्या दरम्यान ही घटना घडली. साईनगरमधील सात बंगल्याच्या मागील परिसरात संशयित तिघांनी मिळून सूरजवर कोयत्याने मानेवर आणि हातांवर वार केले. गंभीर जखमी अवस्थेत त्याला तत्काळ जिल्हा शासकीय रुग्णालयात दाखल करण्यात आले होते. अतिदक्षता विभागात त्याच्यावर उपचार सुरू होते; मात्र उपचारादरम्यान शुक्रवारी, २२ मे रोजी दुपारी अडीचच्या सुमारास त्याचा मृत्यू झाला.

या घटनेप्रकरणी पोलिसांनी तत्काळ हालचाली करत तीन संशयितांना ताब्यात घेतले आहे. सोहम एकनाथ म्हात्रे, अभिषेक देवानंद राठोड आणि नजीबूल शेख उर्फ सोनू अशी त्यांची नावे आहे. या तिघांकडून पोलिस कसून चौकशी केली जात आहे. दरम्यान, मृत सूरज झोरेची बहीण नंदा रमेश फाळे यांनी शहर पोलीस ठाण्यात तक्रार दाखल केली आहे.

या तक्रारीनुसार गुन्हा नोंदवून पुढील तपास सुरू करण्यात आला आहे. या प्रकरणाचा तपास पोलीस उपनिरीक्षक सतीश शिंदे करत असून, हत्येमागील नेमके कारण अद्याप स्पष्ट झालेले नाही. या घटनेमुळे परिसरात भीतीचे वातावरण पसरले असून नागरिकांमध्ये संताप व्यक्त केला जात आहे. पोलिसांनी या प्रकरणाचा सखोल तपास करून आरोपींना कठोर शिक्षा व्हावी, अशी मागणी स्थानिकांकडून केली जात आहे.