अमोल कलये, साम टीव्ही

हायकोर्ट टायपिंग परीक्षेतील कथित पेपरफुटीच्या मुद्द्यावर आंदोलन करणारे अभिजित दीपके यांच्या भूमिकेचे केंद्रीय मंत्री रामदास आठवले यांनी कौतुक केले आहे. चिपळूण दौऱ्यावर असताना आठवले यांनी दीपके यांना रिपब्लिकन पार्टी ऑफ इंडिया (RPI)मध्ये प्रवेशाची खुली ऑफर दिली. मात्र, पक्षप्रवेशासाठी काही अटी आणि शर्ती असतील, असेही त्यांनी स्पष्ट केले.

अभिजित दीपके यांनी विद्यार्थ्यांच्या प्रश्नांसाठी घेतलेली भूमिका योग्य असल्याचे रामदास आठवले यांनी म्हटले. मात्र, जंतर-मंतरवरील आंदोलन शांततापूर्ण पद्धतीने व्हायला हवे होते, अशी प्रतिक्रिया त्यांनी दिली. दीपके यांनी RPIमध्ये प्रवेश केल्यास त्यांचे स्वागतच करू, असे आठवले यांनी सांगितले. पक्षात प्रवेश दिल्यानंतरही त्यांना आंदोलन करण्याची परवानगी असेल का, याबाबत विचारले असता, पक्षाच्या भूमिकेनुसार आणि ठरावीक अटी-शर्तींनुसार त्यांना पक्षात प्रवेश दिला जाईल, असे आठवले यांनी स्पष्ट केले.

दरम्यान, दलित समाजातील तरुणांनी केंद्र आणि राज्य सरकारच्या विविध शासकीय योजनांचा लाभ घ्यावा, असे आवाहनही रामदास आठवले यांनी केले. तरुणांनी स्वतःच्या पायावर उभे राहण्यासाठी शिक्षण, रोजगार आणि व्यवसायाच्या संधींचा उपयोग करून घ्यावा, असेही त्यांनी सांगितले.

कोकणच्या विकासासाठी पर्यटनाला मोठ्या प्रमाणात चालना देण्याची गरज असल्याचेही आठवले यांनी नमूद केले. कोकणातील पर्यटनस्थळांचा विकास झाल्यास स्थानिक तरुणांना रोजगाराच्या संधी उपलब्ध होतील आणि परिसराच्या आर्थिक विकासाला गती मिळेल, असे ते म्हणाले. NEET पेपरफुटीच्या विरोधात अभिजीत दीपके यांनी दिल्लीच्या जंतर-मंतरवर जोरदार आंदोलन केले. या आंदोलनात देशभरातून तरुण सहभागी झाले होते. अखेर मोदी सरकारला कॉकरोच जनता पार्टीसमोर झुकावे लागले आणि शिक्षणमंत्री धर्मेंद्र प्रधान यांचा राजीनामा घेतला. यानंतर एकनाथ शिंदे यांच्या नेत्यांनी देखील अभिजीत दीपके यांची भेट घेतली होती. यावर भाजपने नाराजी व्यक्त केली होती. अशातच आज केंद्रीय राज्य मंत्री रामदास आठवले यांनी थेट पक्षात येण्याची ऑफर दिल्याने चर्चांना उधाण आले आहे.