Raj Thackeray Speech in MNS Melava : महाराष्ट्र नवनिर्माण सेनेचे अध्यक्ष राज ठाकरे यांनी शिवसेना फुटीनंतर घडलेल्या घडामोडींवरही भाष्य केलं आहे. अचानक अलिबाबा आणि चाळीस जण शिवसेनेतून निघून गेले. फक्त त्यांना चोर म्हणता येणार नाही. कारण तेही कंटाळून गेले, असं राज ठाकरे यांनी म्हटलं. गुढीपाडव्याच्या निमित्ताने मुंबईत शिवाजी पार्क मैदानात मनसेच्या मेळाव्यात राज ठाकरे बोलत होते.

एकनाथ शिंदे यांच्या बंडावर बोलताना राज ठाकरे यांनी म्हटलं की, अलिबाबा आणि चाळीस जण शिवसेनेतून निघून गेले. शिवसेनेतील कार्यपद्धतील कंटाळून ते गेले. एकनाथ शिंदे सूरतहून गुजरातला गेले. महाराष्ट्रात सूरत लुटून आलेलं ऐकलं होतं. पण पहिल्यांदाच महाराष्ट्र लुटून सूरतला गेले, अशी टिप्पणीही राज ठाकरेंनी केली.

राज ठाकरे यांनी यावेळी मुख्यमंत्री एकनाथ शिंदे यांना एक सल्लाही दिला. मुख्यमंत्री शिंदेंना एकच सांगणं आहे, उद्धव ठाकरे जिथे सभा घेतील तिथे पुन्हा सभा घेत फिरु नका. ते गुंतवून ठेवतील, लोकांच्या प्रश्नांचं काय? पेन्शनचा विषय आहे, शेतकऱ्यांचा विषय आहे, अवकाळीनंतर शेतकऱ्यांना भेटलं पाहिजे, सभा कसल्या घेता, असंही एकनाथ शिंदेंना उद्देशून राज ठाकरे यांनी म्हटलं.

शिवसेना आणि धनुष्यबाणावरुन झालेला वाद पाहून वेदना झाल्या

ज्यावेळी शिवसेना आणि धनुष्यबाण तुझं की माझं हे चालू होतं त्यावेळी प्रचंड वेदना होत होत्या. इतकी वर्ष तो पक्ष पाहत आलो, जगलो. राजकारण लहानपणापासून पाहत आलो, अनुभवत आलो. असंख्य लोकांनी कष्टाने उभी केलेली संघटनेत सुरु असलेल्या घडामोडींमुळे वाईट वाटलं, असं राज ठाकरे यांनी म्हटलं.