देशाचा उमदा उद्योगपती, ज्यांच देशाशी उद्योगापलिकडे नातं होतं, त्या रतन टाटांनी जगाचा अखेरचा निरोप घेतला. मात्र त्यांनी उद्योगपती आणि माणूस कसा असावा हे जगाला शिकवलं. असं सभ्य व्यक्तीमत्त्व जर लोकांना आवडतं तर राजकारणात असे लोक तुम्हाला का आवडत नाहीत?, असा सवाल महाराष्ट्र नवनिर्माण सेनेचे नेते राज ठाकरे यांनी महाराष्ट्राच्या जनतेला केलं.

रतन टाटांकडे मी बोटेनेकल गार्डन चा आराखडा घेऊन गेलो ते म्हणाले सरकारी सांगितलं तर टक्केवारीत जातं. मी म्हटलं CSR फंडातून करावे लागेल. बजेट वाढत गेलं, पण त्यांनी कधी नाराजी नाही दाखवली.. कारण काम चांगलं होत आहे. ३ कोटी चे प्रोजेक्ट १४ कोटी वर गेले. दुसरं काही असेल तर सांगा आम्हाला तुमच्यासोबत काम कार्याची इच्छा आहे.वरळी पासून दादर चौपाटीपर्यंत सुशोभीकरण करण्याचं ठरलं. पण काही अडथळे कसे आणता येतील यासाठी असतात, असा टोला राज ठाकरे यांनी लगावला.

राज ठाकरे काय म्हणाले?

मी असा महाराष्ट्र कधी नाही पाहिला, अशी विचार धार पहिली नाही. कोण कुठे जातो?. यांचे घरचे यांना कसे साथ देतात. काय संस्कार करत आहोत?. शरद पवार म्हणतात माझा पक्षा फोडला, मात्र काँग्रेस फोडली, शिवसेना फोडली, तुम्ही कशा अशा गोष्टी बोलतात. अजित पवार गुलाबी जॅकेट घालून फिरतात. त्यांना भाजपने स्वीकारलं कसं? अजित पवार भाजपसोबत यायच्या आधी मोदी म्हणाले की घोटाळेबाजांना जेलमध्ये टाका, जेलमध्ये म्हणजे पक्षात घेतलं.

लाडकी बहीण योजना कोणाला हवी होती?

लाडकी बहीण योजना आणली आणि पैसे वाटतं सुरू आहे. पण कोणी मागितले होते पैसे?. पुढच्या महिन्यापर्यंत येतील मग नाही येणार. महाराष्ट्र सरकारकडे पगार द्यायला पैसे नसतील. महिलांना सक्षम बनवा त्यांना काम द्या, त्यांना पैसे कमवू द्या, फुकट कसले पैसे देता?. बेरोजगारांना पैसे, शेतकऱ्यांना फुकट वीज. शेतकरी म्हणतो की थोडे पैसे घ्या पण वीज तर द्या.

मराठा आरक्षण मिळणार नाही?

मराठा समाजाला आरक्षण देण्याबाबात मला काही लोक भेटले, पण मराठा समाजाबाबत स्पष्ट भूमिका मांडली. सगळ्या राजकीय नेत्यांना माहिती आहे की आरक्षण देणं राज्याच्या हातात नाही. शरद पवारांपासून भाजपपर्यंत सर्वांनाच याची कल्पना आहे. मात्र कोणी सांगत नाही. तामिळनाडूत आरक्षण दिलं पण ते अजून कोर्टात अडकलं आहे.