राज्यभरात आज रात्री १२ वाजता जन्माष्टमी साजरी केली जाणार आहे. श्रीकृष्णाच्या जन्मसोहळ्याला वरूण राजाची हजेरी लागण्याची शक्यता हवामान विभागाची शक्यता आहे. काल मुंबईसह अनेक ठिकाणी रिमझिम सरी कोसळल्या. आज विदर्भ, मध्य महाराष्ट्र आणि मराठवाड्यात काही ठिकाणी विजांच्या कडकडाटासह पावसाची शक्यता हवामान विभागाने वर्तवली आहे. तसेच राज्यात टप्प्या टप्प्याने पावसाचा जोर वाढण्याची शक्यता आहे. दरम्यान नागरिकांनी गरज असेल तरच घराबाहेर पडण्याचे आवाहन हवामान विभागाकडून करण्यात आले आहे. पुढील काही दिवसांत महाराष्ट्रात पावसाचा जोर वाढण्याची शक्यता आहे.

हवामान विभागाच्या अंदाजानुसार, आज विदर्भातील काही भागांत पावसाचा जोर वाढण्याची शक्यता आहे. गोंदिया, गडचिरोली आणि चंद्रपूर जिल्ह्यांत स्थानिक वातावरणाच्या प्रभावामुळे वादळी पावसाच्या सरी पडू शकतात. धुळे जिल्ह्यातही विजांच्या कडकडाटासह वादळी वारे आणि पावसाची शक्यता आहे.

मध्य महाराष्ट्र आणि मराठवाड्यात काही भागांत ढगाळ वातावरण राहण्याची शक्यता असून, विजांसह हलक्या पावसाच्या सरी पडू शकतात. राज्याच्या उर्वरित भागात मात्र पावसाचा फारसा जोर राहणार नसून, ढगाळ वातावरणासह ऊन-सावल्यांचा खेळ पाहायला मिळण्याची शक्यता आहे. काही ठिकाणी तुरळक हलक्या सरी पडण्याचा अंदाज आहे.

दरम्यान, मध्य प्रदेश आणि परिसरावर कमी दाबाचे क्षेत्र सक्रिय झाले आहे. या प्रणालीला लागून समुद्रसपाटीपासून सुमारे ७.६ किलोमीटर उंचीपर्यंत चक्राकार वाऱ्यांची स्थिती निर्माण झाली आहे. ही हवामान प्रणाली आज दक्षिण उत्तर प्रदेश आणि उत्तर मध्य प्रदेशाच्या दिशेने सरकण्याची शक्यता आहे. या प्रणालीच्या हालचालीमुळे विदर्भासह राज्यातील काही भागांतील पावसाच्या स्थितीत बदल होण्याची शक्यता आहे.