पुणे : पुणे जिल्ह्यातील शिरुर तालुक्यातील मौजे वढू बु. येथे साजरी होणाऱ्या श्री.छत्रपती संभाजी महाराज पुण्यतिथी निमित्त २८ मार्च रोजी रात्री १० वाजल्यापासून ते २९ मार्च सकाळी १० वाजेपर्यंत जड वाहतूक, माल वाहतूक (ट्रक, टेम्पो) आदी वाहनांच्या मार्गामध्ये बदल करण्यात आले आहेत. तसेच शंभू भक्तांच्या वाहनांना थांब्याच्या ठिकाणापुढे (स्टॉपेज पॉईंट) वाहने घेऊन जाण्यास मनाई करण्याबाबतचे आदेश जिल्हाधिकारी तथा जिल्हादंडाधिकारी जितेंद्र डूडी यांनी जारी केले आहेत.

शंभू भक्तांची वाहने वगळता कोरेगाव भीमा बाजूकडून येणारी आणि वढू बु. मार्गे चाकण किंवा पाबळला जाणारी अवजड वाहतूक कोरेगाव भीमा-सणसवाडी-शिक्रापूर गॅस फाटा-वाजेवाडी चौफुला मार्गे चाकण, पाबळ बाजूकडे जाईल. चाकण, पाबळ बाजूकडून येणारी व वढू.बु कोरेगाव भीमामार्गे पुणे बाजूकडे जाणारी अवजड वाहतूक वाजेवाडी चौफुला-गॅस फाटा-शिक्रापूर-सणसवाडी-कोरेगाव भीमामार्गे पुणे बाजूकडे जाईल.

कोरेगाव भिमा बाजूकडून येणारी शंभू भक्तांची वाहने कोरेगाव भीमा-वढू मार्गावरील माहेर संस्थेजवळ असणाऱ्या स्टॉपेज पॉईंटच्या पुढे जाण्यास मनाई करण्यात येईल, असंही आदेशात नमूद करण्यात आलं आहे.