सागर आव्हाड 
पुणे : शिक्षणाचा हक्क (आरटीई) कायद्यांतर्गत आर्थिक, दुर्बल घटकातील मुलांना शिक्षणाच्या प्रवाहात आणण्यासाठी खासगी शाळांमध्ये २५ टक्के जागा आरक्षित असतात. यासाठीच्या प्रवेश प्रक्रियेला सुरवात झाली असून आरटीई अंतर्गत प्रवेश मिळावा यासाठी पालकांकडून खोटी माहिती भरण्यात आली. सदरचा प्रकार उघड झाल्याने अशा १८ पालकांवर गुन्हा दाखल करण्यात आला आहे. 

शिक्षण हक्क कायद्यांतर्गत खासगी शाळांमध्ये २५ टक्के आरक्षण असलेल्या जागांसाठी प्रवेश प्रक्रियेला सुरवात झाली आहे. त्यानुसार पालकांकडून आपल्या पाल्याचा प्रवेश निश्चित होण्याच्या अनुषंगाने ऑनलाईन अर्ज भरण्यात आले आहे. यांची छाननी होऊन लॉटरी पद्धतीने तीन फेऱ्यांमधून प्रवेश दिला जात असतो. याकरिता शासनाने ठरवून दिलेल्या निकषात पात्र विद्यार्थांनाच आरक्षणांतर्गत प्रवेश दिला जात असतो. मात्र यात खोटी माहिती भरल्याचा प्रकार जानेवारी २०२४ ते ऑक्टोबर २०२४ या कालावधीत माताळवाडी भुगाव येथे घडला.

अशी केली फसवणूक
दरम्यान सदरच्या फसवणुकीच्या प्रकारात पालकांनी त्यांच्या पाल्यांना आरटीई मधील प्रवेश घेण्यासाठी खोटा रहिवासी पुरावा सादर केला. शिक्षण विभागाने केलेल्या छाननीमध्ये हा प्रकार उघडकीस आला. त्यानंतर शिक्षण विभागाकडून संबंधित पालकांवर खोटी माहिती दिल्या प्रकरणी गुन्हा दाखल करण्यात आला आहे. बावधन पोलीस तपास करीत आहेत.

१८ पालकांवर गुन्हा दाखल 
पोलिसांनी दिलेल्या माहितीनुसार सचिन चंद्रकांत भोसले (वय ३४), खंडू दिलीप बिरादार (वय ३३), रामकृष्ण तानाजी चोंधे (वय ४०), सुमित सुरेश इंगवले (वय ३४), विजय सुभाष जोजारे (वय ३४), मंगेश गुलाब काळभोर (वय ४३), रोहिदास मारुती कोंढाळकर (वय ३६), श्रीधर बाबुराव नागुरे (वय ३८), बाबासाहेब छबुराव रंधे (वय ४०), विलास रामदास साळुंखे (वय ३४), गणेश राजाराम सांगळे (वय ३५), रुपेश बाळकृष्ण सावंत (वय ३८), दिगंबर पंडित सावंत (वय ४०), चंदन अंकुश शेलार (वय ४४), कुंभराम सांगिलाल सुतार (वय ३३), मंगेश झगुलाल गुरव (वय ३३), विवेक जयवंत जोरी (वय ३०), उमेश हिरामण शेडगे (वय ४०) अशी गुन्हा दाखल झालेल्या पालकांची नावे आहेत.