अक्षय बडवे

पुणे : कल्याणीनगर येथील पोर्शे अपघाताला आज सहा महिने पुर्ण होत आहेत. यानिमित्ताने तरुणाईने रस्त्यावर उतरून स्वत:ची एक मेणबत्ती आणत पेटवून आदरांजली वाहिली. विशेष म्हणजे राजकीय धामधूमित राजकीय पक्ष विरहीत ही आदरांजली वाहण्यात आली.

पुण्याच्या (Pune) कल्याणीनगर परिसरात आजच्या सहा महिन्यांपूर्वी म्हणजे १८ मे रोजीच्या मध्यरात्री अल्पवयीन कारचालक असलेल्या भरधाव आलिशान पोर्शे कारने आयटी इंजिनिअर असलेल्या अनिश अवधिया आणि अश्विनी कोस्टा यांना जोरदार (Porsche Accident) धडक दिली. यात दोघांचा मृत्यू झाला होता. या घटनेला आज (१८ नोव्हेंबर) सहा महिने पुर्ण होत आहेत. हे प्रकरण पुण्यासाठी आणि पुणे पोलिसांसाठी महत्वाचे ठरले होते. 

नाट्यमय घडामोडी तसेच श्रीमंतीचा माज तसेच मुलांना पोलीस ठाण्यात पिझ्झा देणे यासह पैशांच्या जोरावर व राजकीय पावरचा वापर आणि ससून रुग्णालयात रक्त बदल यामुळे राज्यभरात हे प्रकरण गाजले. पोलिसांनी या प्रकरणाचा तपास करून मुलाचे आई- वडिल, ससून रुग्णालयातील दोन डॉक्टरांसह एक कामगार तसेच रक्त बदल केल्याच्या प्रकरणात मदत करणारे अशा सर्वांना अटक केली. त्यांच्याविरोधात दोषारोपपत्र देखील दाखल केले आहे. या घटनेचा तपास सुरू आहे.

दरम्यान, सदर घटनेला ६ महिने पुर्ण होत असल्याने या अपघातात जीव गमावलेल्या अनिश व अश्विनी यांना आदरांजली वाहण्यासाठी तरुणाईने अपघातास्थळी एकत्र जमत "एक मेणबत्ती पेटवून" त्यांना आदरांजली वाहिली. दोघांचे कुटुंब न्यायाच्या प्रतीक्षेत आहेत. माणुसकीच्या नात्याने तसेच एक समाज म्हणून तसेच त्यांना न्याय मिळवून देण्यासाठी प्रयत्नशील राहूयात, असे मत यावेळी तरूणाईने व्यक्त केले.