अक्षय बडवे 
पुणे : पुण्यातील तळजाई टेकडी परिसरात पोलीसात भरती होण्यासाठी अनेकजण सराव करण्यासाठी येत असतात. तर सराव येथे करत असलेल्या विद्यार्थ्यांना गावगुंड असलेल्या पैलवानांनी मारहाण केल्याचा आरोप करण्यात आला आहे. तसेच यामध्ये मोठ्या प्रमाणात महिलांची छेडछाड आणि मारहाण केल्याचा आरोप देखील या विद्यार्थ्यांनी केला आहे.

पुणे शहर परिसरातील तळजाई टेकडीवर पोलिस भरतीसाठी मैदान तयार करण्यात आले आहे. यामुळे याठिकाणी मैदानी सराव करण्यासाठी दररोज शेकडो विद्यार्थी जात असतात. या ठिकाणी असलेल्या मोकळ्या जागेवर व्यायाम करण्यासाठी आणि इतर मैदानी सरावासाठी पोलिस भरतीची तयारी करत असलेले विद्यार्थी येतात. यामुळे येथे दिवसभर विद्यार्थ्यांची गर्दी कायम असते.

सराव बंद करण्यासाठी धमकावले 

दरम्यान आज देखील काही विद्यार्थी सरावासाठी आले होते. हे विद्यार्थी मैदानी सराव सुरू असताना काही स्थानिक गावगुंडांनी तिथे येत सराव बंद करण्याची धमकी दिली. यामुळे सर्व करणाऱ्या विद्यार्थांनी याबाबत विचारणा केली असता त्यांच्या वाद निर्माण झाला. या वादाचे रूपांतर काही वेळातच हाणामारी मध्ये झाले. या दरम्यान गावगुंडांकडून या ठिकाणी १५ ते २० विद्यार्थ्यांना मारहाण करण्यात आल्याचा आरोप काही जणांनी केला आहे.  

विद्यार्थी पोहचले पोलिसात 

पुणे फिटनेस क्लब पोलीस अकॅडमीचे हे सगळे विद्यार्थी आहे. दरम्यान गेल्या अनेक दिवसांपासून हे स्थानिक गावगुंड यांचा पाठलाग सुद्धा करत असल्याचं विद्यार्थ्यांनी म्हटले आहे. मारहाण झाल्यानंतर हे सर्व विद्यार्थी सहकारनगर पोलिस ठाण्यात जमले असून पोलिसांकडून गुन्हा दाखल करून घेतला जात नसल्याचा आरोप विद्यार्थ्यांनी केला आहे.