राज्यात नुकत्याच नागरपरिषद आणि नगरपंचायतींच्या निवडणुका पार पडल्या असून या निवडणुकांच्या निकालाच्या पार्श्वभूमीवर अहमदपूर शहरात एक धक्कादायक घटना घडली आहे. जुन्या वादाची - कुरापत काढत २६ वर्षीय तरुणाची चाकूने वार करून व काठीने मारहाण करुन अमानुष हत्या करण्यात आली. या घटनेने परिसरात एकच खळबळ उडाली. या प्रकरणात अहमदपूर पोलिसांनी सहा जणांविरुद्ध खुनाचा गुन्हा दाखल केला आहे. मृत तरुणाचे नाव शोएब इसाक बागवान आहे.

मिळालेल्या माहितीनुसार, मृत तरुण शोएब हा पुण्यात व्यवसाय करत असून निवडणूक निकाल पाहण्यासाठी खास अहमदपूरला आला होता. शहरातील अबुबकर चौक ते अबुबकर मशिदीच्या दरम्यान रविवारी दि. २१ डिसेंबर रोजी रात्री सुमारे ९ वाजताच्या सुमारास किराणा दुकानाजवळ शोएब आणि त्याचा मित्र उमेर खाजामौनोद्दीन बागवान हे बोलत उभे होते.

यादरम्यान या दोघांवर ६ जणांनी हल्ला केला. शोएबचा घटनास्थळीच मृत्यू झाला. तर त्याच्यासोबत असलेला उमेर बागवान हा तरुण गंभीर जखमी झाला. या प्रकरणी अहमदपूर पोलिस ठाण्यात सिकंदर खलील शेख, समीर खलील शेख, आमीर खलील शेख, कलीम खलील शेख, गणीबी शेख व मालन बबलू शेख यांच्याविरुद्ध गुन्हा दाखल केला.

विवाहित असलेल्या शोएबच्या पश्चात पत्नी वतीन लहान मुले असून, या घटनेमुळे बागवान कुटुंबावर दुःखाचा डोंगर कोसळला आहे. घटनेचा पुढील तपास सहाय्यक पोलिस निरीक्षक केदासे हे पोलिस निरीक्षक मेत्रेवार यांच्या मार्गदर्शनाखाली करत आहेत. हत्या कोणत्या कारणातून झाली, याचा तपास सुरू आहे.