संघर्ष गांगुर्डे, कल्याण

राज्याच्या राजकारणात सध्या गट फोडाफोडीचे सत्र सुरु असताना दुसरीकडे एकमेकांवर टीका टिपण्ण्या सुरुच आहे. भाजप नेते गणेश नाईक यांनी उपमुख्यमंत्री एकनाथ शिंदे आणि खासदार डॉ. श्रीकांत शिंदे यांच्यावर टीका केली होती. याच टीकेला खासदार शिंदे यांनी एका कार्यक्रमात बोलताना सडेतोड प्रत्युत्तर दिले आहे. खासदार श्रीकांत शिंदे यांनी म्हटले आहे की, येत्या २०२९ च्या लोकसभा निवडणुकीत माझ्यासमोर लढा जनतेचा कौल कोणाच्या बाजूने आहे हे स्पष्ट होईल.

महाशिवरात्रीच्या निमित्ताने डोंबिवलीतील पिंपळेश्वर महादेव मंदिर येथे विधिवत पूजा व दर्शन घेतल्यानंतर पत्रकारांशी संवाद साधताना त्यांनी गणेश नाईक यांच्यावर जोरदार निशाणा साधला. गणेश नाईक यांना वयोमानानुसार स्मृतिभ्रंश झाला असावा, त्यामुळे ते काहीही टीका करत आहेत. आम्हाला माजी करण्याची भाषा त्यांनी करू नये. नागरिकांनी त्यांनाच अनेकदा माजी केले आहे, याचे भान त्यांनी ठेवावे,असा टोला त्यांनी लगावला.

यावेळी पुढे बोलताना डॉ. शिंदे म्हणाले, येत्या २०२९ च्या लोकसभा निवडणुकीत कल्याण किंवा ठाणे लोकसभा मतदारसंघातून आमच्या समोर येऊन निवडणूक लढवावी. जनतेचा कौल कोणाच्या बाजूने आहे हे स्पष्ट होईल असे थेट खुले आव्हानही त्यांनी दिले.

महाशिवरात्रीच्या पावन दिवशी भगवान शंकराचे आशीर्वाद घेऊन विकासकामांच्या गतीला आणखी वेग देण्याचा निर्धार व्यक्त करत, कल्याण लोकसभा मतदारसंघातील प्रलंबित प्रश्न सोडविण्यासाठी आपण कटिबद्ध असल्याचेही त्यांनी सांगितले.