महाराष्ट्रातील मतचोरीच्या मुद्द्यावरुन आक्रमक होत राहुल गांधींनी निवडणूक आयोगाला आरोपीच्या पिंजऱ्यात उभं केलं आहे. त्यानंतर आता प्रकाश आंबेडकरांनी राहुल गांधींना एकत्र येण्याचं आवाहन केलं आहे.

महाराष्ट्र विधानसभा निवडणुकीत १ कोटी बोगस मतदार आढळून आल्याचे पुरावे सादर करत राहुल गांधीनी निवडणूक आयोगाविरोधात एल्गार पुकारला आहे. त्यात प्रकाश आंबेडकरांनी उडी घेतली आहे. तर राहुल गांधींच्या भूमिकेचं स्वागत करत प्रकाश आंबेडकरांनी राहुल गांधींना न्यायलयीन लढाईत साथ देण्याचं आवाहन केलं आहे.

महाराष्ट्राच्या निवडणुकीत सायं. ६ नंतर तब्बल ७६ लाख मतदारांनी मतदान केल्याचं समोर आलं आहे. त्यामुळे महाराष्ट्राची विधानसभा निवडणूक संशयाच्या फेऱ्यात अडकली आहे. तर प्रकाश आंबेडकरांनी उच्च न्यायालयात निवडणुकीतील वाढलेल्या मतदानासंदर्भात दाखल केलेली याचिका फेटाळण्यात आली आहे. त्यानंतर आंबेडकरांनी सर्वोच्च न्यायालयात याचिका दाखल केली आहे.

१९३१ च्या पुणे करारावेळी महात्मा गांधी आणि डॉ. बाबासाहेब आंबेडकर एकत्र आले होते. तर पंडित नेहरु आणि बाबासाहेब आंबेडकरांचंही संविधान सभेत अनेक मुद्द्यांवर एकमत झाल्याचं चित्र होतं. आता डॉ. बाबासाहेब आंबेडकरांचे नातू प्रकाश आंबेडकरांनी लोकशाही वाचवण्यासाठी पंडित नेहरुंचे वारसदार राहुल गांधींनी सोबत येण्याचं आवाहन केलं आहे. त्यामुळे राहुल गांधी प्रकाश आंबेडकरांच्या आवाहनाला प्रतिसाद देऊन मतचोरी विरोधात एकत्र येणार का ? हे पाहणं औत्सुक्याचं असेल.