नगरपालिका निवडणुकीच्या पार्श्वभूमीवर पाथरी शहरातील राजकीय वातावरण तापलं. निवडणूक प्रचारावेळी मोठा राडा झाला. शिवसेना आणि काँग्रेसचे कार्यकर्ते आमनेसामने आले. हाणामारी आणि दगडफेकीपर्यंत हे प्रकरण पोहोचलं. पोलिसांनी पाथरीत तात्काळ अतिरिक्त बंदोबस्त मागवला. तणावपूर्ण परिस्थिती असल्यानं रात्रभर शहराला छावणीचे स्वरुप आले होते.

स्थानिक स्वराज्य संस्थांच्या निवडणुका या पदाधिकारी आणि कार्यकर्त्यांच्या असतात असं वरिष्ठ पातळीवरील नेते म्हणतात. पाथरी शहरात याचं उदाहरण बघायला मिळालं. नगरपालिकेच्या निवडणुकीच्या पार्श्वभूमीवर पाथरी शहरात परिस्थिती चिघळली. प्रचारावेळी जोरदार वाद झाला. शिवसेना आणि काँग्रेसचे कार्यकर्ते एकमेकांना भिडले. त्यामुळं तणावाची परिस्थिती निर्माण झाली होती.

प्रचारावेळी झालेल्या हाणामारीचा व्हिडिओ :

परिस्थिती हाताबाहेर जाऊ नये यासाठी खबरदारी म्हणून पोलिसांनी पाथरीत तातडीने अतिरिक्त पोलीस बंदोबस्त मागितला. त्यामुळं रात्रभर शहराला छावणीचे स्वरुप आले होते. जिल्हा पोलीस अधीक्षक रवींद्रशिंह परदेशी तातडीने घटनास्थळी पोहोचले. रात्रभर ते पाथरीत तळ ठोकून होते. शिवसेनेचे मेहराज शेरगुलखान यांच्या तक्रारीवरून काँग्रेसचे नगराध्यक्षपदाचे उमेदवार जुनेद खान दुर्राणी यांच्यासह इतर आठ ते दहा जणांवर गंभीर गुन्हे नोंदवण्यात आले आहेत.

शिवसेना जिल्हाप्रमुख- माजी आमदारामध्ये संघर्ष

पाथरी नगरपरिषदेची निवडणूक अटीतटीची आणि प्रतिष्ठेची झाली आहे. प्रचाराला वेग आला आहे. राजकीय पक्षांच्या नेत्यांकडून एकमेकांवर आरोप-प्रत्यारोप केले जात आहेत. गेल्या तीन वर्षांपासून माजी आमदार बाबाजानी आणि शिवसेनेचे सईद खान यांच्यात टोकाचा संघर्ष सुरू आहे. २ डिसेंबरला पाथरी नगरपरिषदेच्या निवडणुकीसाठी मतदान होणार आहे. त्याआधीच शिवसेनेचे जिल्हाप्रमुख सईद खान आणि काँग्रेसचे माजी आमदार बाबाजानी यांच्यात संघर्ष सुरू झाला आहे.

शहरातील एकता नगर भागात २१ नोव्हेंबरच्या रात्री प्रचार सुरू असतानाच दोन्ही पक्षांच्या कार्यकर्त्यांमध्ये हाणामारी झाली. तसेच दगडफेकीची घटनाही घडली. त्यामुळं काही वेळ शहरात तणाव होता. या घटनेनंतर दोन्ही नेत्यांनी एकमेकांवर आरोप-प्रत्यारोप केले आहेत.