संदीप नागरे, साम प्रतिनिधी

हिंगोली पोलीस दलातील एक धक्कादायक घटना घडली आहे. औंढा नागनाथ शहरातील मंदिर संस्थांच्या भक्त निवासस्थानात पोलीस उपनिरीक्षकाचा मृतदेह आढळला आहे. ज्ञानेश्वर कदम, असं पोलीस उपनिरीक्षकाचे नाव आहे. ते औंढा नागनाथ शहर पोलीस स्टेशनमध्ये 11 महिन्यापासून कार्यरत होते. दरम्यान पोलीस उपनिरीक्षकाचा मृत्यू कशामुळे झाला आहे, याचे कारण अद्याप अस्पष्ट आहे.

पोलीस निरीक्षक ज्ञानेश्वर कदम हे औंढा मंदिर परिसरात गेल्या काही महिन्यापासून कर्तव्यदेखील बजावत असल्याची माहिती औंढा नागनाथ पोलीस स्टेशनचे पोलीस निरीक्षक गणपत राहिरे यांनी दिली आहे. पोलीस अधिकारी ज्ञानेश्वर कदम यांना एका रोगाने देखील ग्रासले होते अशी माहिती कुटुंबीयांनी दिली आहे.

काल सायंकाळी औंढा नागनाथ मंदिर संस्थांच्या भक्त निवासातील एका रुममधून दुर्गंधी येत असल्याने स्थानिक नागरिकांनी याची माहिती औंढा पोलीस स्टेशनला दिली. त्यानंतर हा धक्कादायक प्रकार उघड झाला. कर्तव्य बजावून विश्रांतीसाठी कदम हे भक्त निवासात गेले असावेत आणि तिथेच त्यांचा मृत्यू झाला असावा असा अंदाज औंढा नागनाथ पोलिसांनी व्यक्त केला असून पोलीस या घटनेचा तपास करत आहे.

ज्ञानेश्वर कदम यांच्या मृतदेहावर औंढा नागनाथ उपजिल्हा रुग्णालयात शबविच्छेदन करण्यात आले असून त्यांच्या मृतदेहावर त्यांचे मूळ गाव असलेल्या रांजाळा येथे शासकीय इन तमामात अंत्यसंस्कार करण्यात आले आहेत, पोलीस उपनिरीक्षक ज्ञानेश्वर कदम यांच्या कुटुंबात दोन मुली पत्नी एक मुलगा नातवंड असा परिवार असून या घटनेमुळे संपूर्ण कदम कुटुंब शोक सागरात बुडाले आहे, हिंगोली चे पोलीस अधीक्षक डॉक्टर निलाभ रोहन यांनी देखील या घटनेनंतर दुःखद सहवेदना व्यक्त केल्या असून दिवंगत पोलीस अधिकारी ज्ञानेश्वर कदम यांच्या कुटुंबीयांना सर्वतोपरी मदत करू असे आश्वासन त्यांनी दिले आहे .