पिंपरी चिंचवड : बडनेरा विधानसभेचे अपक्ष आमदार रवी राणा यांनी लाडकी बहीण योजनेतील निधी बाबत वादग्रस्त वक्तव्य केले आहे. आमदार राणा यांच्या या विधानाचा राज्यभरात ठिकठिकाणी निषेध करण्यात येत आहे. त्यानुसार या विधाना विरोधात पिंपरी- चिंचवड शहरात शिवसेना ठाकरे गटातील महिलांनी आक्रमक होऊन तीव्र आंदोलन केलं आहे.

बडनेरा विधानसभेचे आमदार रवी राणा (Ravi Rana) यांनी लाडकी बहीण योजनेसंदर्भात तुम्ही आम्हाला निवडून दिलं तर आम्ही लाडकी बहिणी योजनेचे पैसे दुप्पट करू, नाहीतर ही योजना कायमस्वरूपी बंद करू..! असा धमकी वजा इशारा रवी राणा यांनी आपल्या भाषणा दरम्यान महिलांना दिला होता. या विधानाचा निषेध शिवसेना ठाकरे गटातील (Thackeray Group) महिलांनी केला आहे. लाडकी बहिण योजनेला आमचा विरोध नाही, मात्र तुम्ही जर  महिलांना धमकी वजा इशारा देत असाल तर ते आम्ही कदापी खपवून घेणार नाहील असा इशाराच दिला आहे.

आपल्या लाडक्या बहिणीला धमकी देणारा भाऊ, हा लाडका भाऊ नसून बहिणीची ओवाळणी खाणारा भाऊ आहे. असा संताप यावेळी शिवसेनेच्या महिला पदाधिकाऱ्यांनी व्यक्त केला आहे. यावेळी शिवसेना ठाकरे गटाच्या महिलांनी महायुती सरकारला पाठिंबा देणारे अपक्ष आमदार रवी राणा यांचा पुतळा पायदळी तुडवत निषेध केला.