सरपंच संतोष देशमुख यांच्या हत्या प्रकरणावरून राजकारण चांगलंच तापलंय. सरकारमधील काही नेते आरोपीला पाठीशी घालत असल्याचा आरोप विरोधकांनी केला. संतोष देशमुख हत्याप्रकरणातील आरोपीला अटक करण्यात यावी. तसंच संतोष कुटुंबाला न्याय मिळवून द्यावा. अशी मागणी करत सर्वपक्षीय नेत्यांनी मुक मोर्चा काढला. अशातच संतोष देशमुख प्रकरणी फरार आरोपींचा मृत्यू झाल्याची माहिती एका व्यक्तीनं अंजली दमानीया यांना दिली होती. मात्र, अंजली दमानिया यांना ज्या व्यक्तीनं माहिती दिली, तो व्यक्ती दारूच्या नशेत असल्याचं पोलीस तपासात उघड झालंय.

संतोष देशमुख हत्या प्रकरणातील आरोपींचे मृतदेह सापडले असून त्यांचा खून करण्यात आला, असं ट्विट अंजली दमानिया यांनी केला होता. त्यांना एका व्यक्तीचा फोन आला होता. त्यात त्या व्यक्तीनं संतोष देशमुख प्रकरणातील आरोपींचा मृत्यू झाल्याची माहिती दिली. देशमुख हत्या प्रकरणातील तीन आरोपींचा मृतदेह कर्नाटक बॉर्डर रोडवर सापडल्याची माहिती त्यांना मिळाली. त्यांनी तातडीने ही माहिती पोलिसांना दिली. त्यांनी व्यक्तीसोबत झालेल्या संवादाचा कॉल रेकॉर्डिंग पोलिसांना पाठवले होते.

पोलिसांनी या प्रकरणी तपास केला असता, दमानिया यांना ज्या व्यक्तीनं ही माहिती दिली, ती व्यक्ती दारूच्या नशेमध्ये होती. हे पोलीस तपासातून समोर आलं आहे. या घटनेविषयी कोणतीही माहिती कोणाकडे असल्यास, त्यांनी पोलीस अधिकाऱ्यास किंवा पोलिसांना द्यावी, असे आवाहन पोलिसांनी दिले आहे.

वाल्मीक कराड यांच्या पत्नीची दुसर्‍यांदा सीआयडीकडून चौकशी

संतोष देशमुख हत्या प्रकरणातील आरोपी वाल्मीक कराड यांच्या पत्नी मंजली कराड यांची सीआयडीकडून दुसर्‍यांदा चौकशी करण्यात आलीय. बीडच्या केज पोलीस ठाण्यात सीआयडीकडून ही चौकशी करण्यात आलीय. सीआयडीचे वरिष्ठ अधिकाऱ्यांनी केज पोलीस ठाण्यातच मंजली कराड यांची एक तास चौकशी केलीय. केज पोलीस ठाण्यात खंडणी प्रकरणात वाल्मीक कराड यांच्यावर गुन्हा दाखल आहे.