सुशिल थोरात, अहिल्यानगर

राज्य शैक्षणिक संशोधन आणि प्रशिक्षण परिषद यांच्या वतीने घेण्यात येणाऱ्या 'PAT' अर्थात संकलित मूल्यमापन परीक्षेचे पेपर परीक्षेपूर्वीच अनेक युट्यूब चॅनलवर उत्तरांसह फूटल्याचा प्रकार समोर आला होता. यासंदर्भात पुण्यातील विश्रामबाग पोलिस ठाण्यामध्ये गुन्हा देखील दाखल करण्यात आला आहे. मात्र असं असताना देखील आज होणाऱ्या इंग्रजीच्या पेपरची प्रश्नपत्रिका ही पुन्हा एकदा फुटली असल्याच समोर आला आहे.

इंग्रजीच्या पेपरची प्रश्नपत्रिका फुटल्यामुळे खळबळ उडाली आहे. जवळपास २५ हून अधिक यूट्यूब चॅनलवर अशा पद्धतीने हे पेपर उत्तरांसह प्रसारित करण्यात आल्याचे अहिल्यानगर शहरातील पालक सचिन काळे यांनी सांगितले आहे. याबाबत काळे यांनी अहिल्यानगर जिल्हाधिकारी यांना निवेदन देऊन संबंधित यूट्यूब चॅनल चालकांवर कठोर कारवाई करण्यात यावी अशी मागणी केली आहे.

याप्रकरणी गुन्हा दाखल होऊन देखील परीक्षापूर्वीच अशा पद्धतीने यूट्यूब चॅनलवर पेपर आल्याने हा विद्यार्थ्यांच्या भविष्याशी खेळ सुरू असल्याचे एका विद्यार्थ्याचे पालक सचिन काळे यांनी म्हटलं आहे. राज्य शैक्षणिक संशोधन आणि प्रशिक्षण परिषदेच्या वतीने इयत्ता पहिली ते नववीपर्यंत ही परीक्षा घेतली जाते. ज्यामध्ये विद्यार्थ्यांचे मूल्यमापन केले जाते.

PAT परीक्षेची प्रत्येक शाळेमध्ये शिक्षकांकडून तयारी करून घेतली जाते. मात्र परीक्षेच्या आधीच संपूर्ण प्रश्नपत्रिका ही जर यूट्यूब चॅनलवर येत असेल तर हे गंभीर असल्याचे सचिन काळे यांनी म्हटलं आहे. तसंच, संबंधित युट्युब चॅनेल चालकांवर अटकेची कारवाई करण्याची देखील मागणी त्यांनी केली आहे. परीक्षेपूर्वीच पेपर फुटल्यामुळे विद्यार्थ्यांमध्ये खळबळ उडाली आहे.