चेतन व्यास, साम टीव्ही

गुन्हेगारी प्रवृतीच्या असलेल्या युवकाने विना तिकीट रेल्वेत चढत आरक्षित डब्यात जागेवरून प्रवाश्यासोबत वाद घातला. वाद घालत थेट प्रवाश्याच्या मानेवर ब्लेडने वार करून जखमी केले. ही घटना धामणगाव ते पुलगाव दरम्यान हावडा अहमदाबाद एक्सप्रेसमध्ये घडली. या प्रकरणी वर्धा रेल्वे पोलिसांनी आरोपीला ताब्यात घेत गुन्हा दाखल केलाय. या घटनेमुळे एकच खळबळ माजली आहे.

अहमदाबाद येथून हावडा येथे जाणारी 12833 अहमदाबाद हावडा एक्स्प्रेसमध्ये दुपारी 4 वाजता दरम्यान धामणगाव येथून हावडाच्या दिशेने सुटली. दरम्यान धामणगाव रेल्वे स्थानकावर आशिष मिसाळ हा युवक एस 1 या डब्यात चढला. आशिषकडे कोणतेही रेल्वे प्रवासाचे तिकीट नव्हते दरम्यान तो एस 1 या डब्यातील 48 क्रमांकाच्या सीटवर बसण्यासाठी तेथील आरक्षित असलेले प्रवासी नरेशकुमार ठाकुराम वर्मा यांच्याशी वाद घालू लागला. आशिषने नरेशकुमारला सीटवर बसण्याच्या कारणावरून शिवीगाळ केली. त्यानंतर धमकी देत लाथा-बुक्यानी मारहाण केली.

आशिष एवढ्यावरच न थांबता त्याने नरेशकुमारच्या मानेवर ब्लेडने वार करून जखमी केले. ही घटना डब्यातील इतर प्रवाशांसमोर घडली. याची माहिती तातडीने रेल्वे पोलिसांना देण्यात आली. रेल्वे पोलिसांनी जखमी आणि आरोपीला रेल्वे स्टेशन वर्धा येथे उतरवून रेल्वे पोलिसांनी ताब्यात घेतले. जखमीची वैद्यकीय तपासणी करून आरोपीविरुद्ध कलम 115(2),118(1),352,351(2)बीएनएस सहकलम 137 रेल्वे अधिनियम प्रमाणे गुन्हा दाखल करण्यात आलाय.आरोपी हा गुन्हेगारी प्रवृतीचा असल्याची माहिती रेल्वे पोलिसांनी दिली आहे.

घटना ही धामणगाव ते पुलगाव रेल्वे स्थानक दरम्यान प्रवासात घडल्याने वर्धा रेल्वे पोलिसांनी प्रकरण दाखल करत बडनेरा रेल्वे पोलिसांकडे वर्ग केले आहे. रेल्वेत घडलेल्या या घटनेमुळे चांगलीच खळबळ माजली असून रेल्वे प्रवाश्यांचा सुरक्षेवर प्रश्नचिन्ह निर्माण झाला आहे.