Parbhani Police Constable Bhagwan Mundhe Bribe नाशिकमध्ये जीएसटी अधिकाऱ्यांना लाखोंची लाच घेताना रंगेहात पकडण्यात आल्याची घटना ताजी असतानाच परभणीत एका पोलीस हवालदाराला देखील लाच घेताना लाचलुचपत प्रतिबंधक विभागाने रंगेहात पकडले आहे. अर्जावर कारवाई करण्यासाठी ही लाच घेतल्याचे समोर आले आहे. यामुळे राज्यात खळबळ उडाली आहे. याप्रकरणी पुढील तपास सुरु आहे.

मिळालेल्या माहितीनुसार, परभणी जिल्ह्यातील सोनपेठ पोलीस ठाण्यात पोलीस हवालदार भगवान मुंढे कार्यरत आहेत. गंगाखेड येथील ७० वर्षीय तक्रारदार यांनी सांगितले गोशाळेतील वादाच्या अर्जावर कारवाई करण्यासाठी पोलीस हवालदार भगवान मुंढे यांनी १० हजार रुपयांची लाच मागितली होती.

पडताळणी दरम्यान तडजोडीअंती ८ हजार रुपये देण्याचे ठरले. याप्रकरणी तक्रारदाराने पोलिसांना माहिती दिली. यानंतर गंगाखेड-परळी रोडवरील निळा फाटा येथील विश्व लक्ष्मी रसवंती गृह येथे पोलिसांनी सापळा रचला. यावेळी मुंढे यांनी पंचासमक्ष तक्रारदाराकडून ८ हजार रुपयांची लाच स्वीकारली.

यावेळेस सापळा लावलेल्या एसीबीच्या पथकाने त्यांना रंगेहाथ पकडले. या कारवाईत हवालदाराकडून मोबाईल, ओळखपत्र व रोख रक्कम जप्त करण्यात आली असून पुढील तपास सुरू आहे. ही कारवाई लाचलुचपत प्रतिबंधक विभागाचे पोलीस उपअधीक्षक राहुल तरकसे यांच्या मार्गदर्शनाखाली करण्यात आली.