परभणी : जिल्‍ह्यात डिझेल अभावी विविध आगारांतून बसफेऱ्या रद्द करण्याची वेळ एसटी महामंडळावर (MSRTC) आली आहे. पाथरी आगारातून १३ बसफेऱ्या रद्द झाल्या आहेत. असाच प्रकार काही दिवसांपूर्वी पाथरी आगारातून (Selu) सेलू तालुक्यासाठी दिल्या जाणाऱ्या ६३ बसफेऱ्या रद्द कराव्या लागल्या. यामुळे प्रवाशांना गैरसोयीचा सामना करावा लागला. (Latest Marathi News)

राज्‍य परिवहन महामंडळाच्‍या प्रत्‍येक आगार बसस्‍थानकात पेट्रोल पंप आहे. तसेच काही खासगी डिझेल पंपावर देखील सुविधा केली आहे. अशात देखील डिझेलच्या (Diesel) तुटवड्यामुळे आगारावर पुन्हा बसफेऱ्या रद्द करण्याची वेळ आली आहे. एसटी महामंडळाला याचा आर्थिक फटका बसत असून ग्रामीण प्रवाशांची तारांबळ उडत आहे. आगारातून तालुक्यातील गावांसह लांबपल्ल्याच्या बस धावतात. दरम्यान डिझेल अभावी बसफेऱ्या रद्द करण्याची वेळ अनेकदा आगारावर येत आहे.

उत्‍पन्‍नावर मोठा परिणाम

बसफेऱ्या रद्द होत असल्‍याने महामंडळाच्या उत्पन्नावर देखील परिणाम होत आहे. तर दुसरीकडे प्रवाशांची गैरसोय होत आहे. प्रवाशांसाठी महामंडळाकडून एसटी आगारनिहाय बसफेऱ्या सोडण्यात येतात. मोठ्या प्रमाणात प्रवासी एसटीला प्राधान्य देत प्रवास करतात. शिवाय विद्यार्थ्यांनाही तालुक्याच्या ठिकाणी शिक्षणासाठी ये-जा करावी लागते. अशात गेल्या दहा ते बारा दिवसांपासून परभणी विभागातील विविध आगारांत डिझेल तुटवड्यामुळे बसफेऱ्या रद्द कराव्या लागत आहेत. दरम्यान पाथरी आगारात पुन्हा १५ बस रद्द कराव्या लागल्या. यामुळे पाच हजार किलोमीटर वाहतूक रद्द झाल्‍याने दीड लाखांचे आर्थिक नुकसान महामंडळाला सहन करावे लागले.