Parbhani:

परभणीमधील जिंतूर तालुक्यातील २ विद्यार्थ्यांचा तलावात बुडून मृत्यू झालाय. मोजे पुंगळा तांडा येथील दोन विद्यार्थी पोहण्यासाठी तलावात गेले होते. पाण्याचा अंदाज न आल्याने दोन्ही मुलांचा मृत्यू झालाय. ६ ऑक्टोबर रोजी शुक्रवार सायंकाळी सहा वाजता ही घटना घडली. यामुळे गावात मोठी शोककळा पसरली आहे. (Latest Marathi News)

पुंगळा गावापासून उत्तर दिशेला पुंगळा तांडा असून तांड्याच्या बाजूलाच एक छोटासा लघू सिंचन तलाव आहे. या तलावावर पोहण्यासाठी चार-पाच विद्यार्थी गेले होते. सायकल, बूट, चप्पल, कपडे काढून दुपारी चारच्या सुमारास पोहोत असताना अचानक दोन विद्यार्थी पाण्यात बुडाले.

बराच वेळ झाला तरी ते वरती आले नाहीत त्यामुळे इतर मुलांनी घरी जाऊन त्यांच्या पालकांना ही माहिती सांगितली. त्यानंतर पालक आणि परिसरातील नागरिकांनी तलावावर मोठी गर्दी केली. व्यवस्थित शोध घेतला असता दोन्ही विद्यार्थ्यांचा मृतदेह सापडला.

गोविंद संजू राठोड राठोड (वय ९ वर्षे) इयत्ता 3 री मध्ये शिकत होता. युवराज कृष्णा चव्हाण (वय 11 वर्षे) इयत्ता पाचवीमध्ये शिकत होता. ही दोन्ही मुलं तलावात मृत अवस्थेत होती. या घटनेमुळे तांडा परिसरात हळहळ व्यक्त केली जात आहे.

रात्री उशिरा त्यांच्यावर अंत्यसंस्कार करण्यात आले आहेत .जिंतूरचे माजी आमदार विजय भांबळे यांनी भेट देऊन सदरील विद्यार्थ्यांच्या आई-वडिलांचे सांत्वन केले. पुंगळा गावचे सरपंच व नागरिक मोठ्या संख्येने उपस्थित होते.