Summary -

• पंढरपूरमध्ये तहसीलदार संजय भोसले यांच्यावर वाळू माफियांचा जीवघेणा हल्ला.

• काळ्या स्कॉर्पिओने गाडीला धडक देऊन कारवाई रोखण्याचा प्रयत्न.

• मुंगशी गावातील सीना नदीच्या पात्रातून अवैध वाळू उत्खनन सुरु होते.

• आरोपी फरार असून पोलिस त्यांचा शोध घेत आहेत.

पंढरपुरमध्ये तहसीलदाराला वाळू माफियांनी जीवे मारण्याचा प्रयत्न केल्याची धक्कादायक घटना समोर आली आहे. वाळू माफियांविरोधात कारवाई करण्यास आले असता हा प्रकार घडला. वाळी माफियांनी तहसीलदाराला कारन चिरडण्याचा प्रयत्न केला. या प्रकरणी आरोपींविरोधात गुन्हा दाखल करण्यात आला असून पोलिस त्यांचा शोध घेत आहेत. या घटनेचा व्हिडीओ देखील समोर आला असून तो व्हायरल होत आहे.

माढ्याचे तहसीलदार संजय भोसले यांना वाळू माफियांकडून जिवे मारण्याचा प्रयत्न करण्यात आला. माढ्याच्या मुंगशी गावातील सीना नदीच्या पात्रातून जेसीबीद्वारे वाळू उत्खनन करणाराना तहसीलदारांनी पथकासह कारवाई करण्यासाठी आले. यावेळ त्यांनी एक टिप्पर, दोन ट्रॅक्टर ट्रॉलीसह उत्खनन करुन वाहतूक करताना वाळू माफियांना पकडले. वाहने पकडू नयेत म्हणून वाळू माफियाने काळ्या रंगाच्या स्क्रारपिओ कारने तहसीलदारांच्या गाडीला धडक दिली.

त्यानंतर वाळू माफियांनी तहसीलदार यांच्या कारला जोरदार धडक देत रिव्हर्स कार चालवून कारवाईसाठी पुढं जाण्यास अडथळा निर्माण करुन तहसीलदारासह -मंडळाधिकारी आणि तलाठी यांना जीवे मारण्याचा प्रयत्न केला. याबाबत कुर्डूवाडी पोलिसांत जीवे मारण्याचा प्रयत्न केल्याप्रकरणी आरोपींविरोधात गुन्हा नोंद करण्यात आला आहे. आरोपी स्वप्नील कांबळे, जेसीबी आणि ट्रॅक्टर चालकांविरोधात गुन्हा दाखल करण्यात आला आहे. आरोपी फरार असून पोलिस त्यांचा शोध घेत आहेत. वाळू तस्करांच्या मुजोरीचा हा व्हिडीओ समोर आला असून तो व्हायरल होत आहे.