Pandharpur Storm News : पंढरपूर येथून काळीज पिळवटून टाकणारी एक घटना समोर आली आहे. राज्यात गेल्या काही दिवसांपासून अवकाळी पावसाने हजेरी लावली आहे. पावसाच्या थैमानाने शेतकरी हवालदील झाला आहे. अशात हा अवकाळी पाऊस आता एका चिमुकलीच्या जिवावरही उठला आहे. झोपेतच झोळी खाली पडल्याने एका चिमुकलीचा मृत्यू झालाय. (Accident News)

मिळालेल्या अधिक माहितीनुसार, पंढरपूरच्या सांगोला तालुक्यातील जवळा येथे मरीआई गाडीवाले कुटुंबावर या घटनेमुळे दु:खाचा डोंगर कोसळला आहे. कस्तुरी साधू चव्हाण असं २ वर्षीय मृत चिमुकलीचं नाव आहे. वावटळ आल्याने बांधलेली झोळी खाली पडली. सोसाट्याच्या वाऱ्याने झोळीसकट चिमुकली एका दगडावर आफटली.

प्रत्येक आईला आपलं बाळ झोपल्यानंतरच घरातली कामे उरकता येतात. काल कस्तुरीच्या आईने तिला पोटभर जेऊ घातले आणि झोळीत तिला झोका देत झोपवले. आपलं बाळ शांत झोपलेलं असताना आईने देखील आपल्या कामाला सुरूवात केली. अशात अचानक दुपारच्यावेळी सोसाट्याचा वारा सुटला आणि वादळ (Storm) आले.

या घटनेत आपल्या झोपलेल्या चिमुकलीचा असा दुर्दैवी अंत होईल याची आईला काहीच कल्पना नव्हती. चिमुकली गाढ झोपेत असतानाच तिच्यावर काळाने घाला घातला. झोळी उडून दगडावर आपटली यात कस्तुरीच्या डोक्याला मार लागल्याने तिचा मृत्यू झाला. या घटनेमुळे संपूर्ण गावात हळहळ व्यक्त होत आहे.