पुणे-सोलापूर महामार्गावर भयंकर अपघात, क्रूझरची ट्रकला जोरात धडक, ३ जणांचा जागीच मृत्यू

Pune Solapur Indapur accident news : पुण्यातील इंदापूरमध्ये आज सकाळी भीषण अपघात झाला असून ३ जणांचा जागीच मृत्यू झाला. लोणी देवकरजवळ क्रुझरला ट्रकने जोरात धडक दिल्याने अपघाताची घटना घडली. वेगात असणाऱ्या क्रूझर गाडीचं टायर फुटल्याने चालकाचे नियंत्रण सुटले. क्रूझर थेट समोरून येणाऱ्या ट्रकला जोरात धडकल्याने अपघात झाला. या अपघातानंतर महामार्गावर मोठ्या प्रमाणात वाहतूककोंडी झाली होती. तात्काळ मदत करण्यासाठी स्थानिक धावले. जखमींना रूग्णालयात दाखल कऱण्यात आले आहे. पोलिसांनी ३ जणांचे मृतदेह पोस्टमार्टमसाठी पाठवले आहेत. तर अपघातग्रस्त वाहनांना ताब्यात घेतले असून तपास कऱण्यात येत आहे.

पुणे सोलापूर राष्ट्रीय महामार्गावर इंदापूर तालुक्यातील लोणी देवकर परिसरात क्रुझर जीपचा टायर फुटून समोरून येणाऱ्या ट्रकला धडकल्याने मोठा अपघात झाला. या अपघातामध्ये क्रुझर गाडीतून प्रवास करणाऱ्या तिघांचा जागीच मृत्यू झालाय. अपघातामध्ये मृत पावलेले तिघेही लोणी देवकर एमआयडीसीमधील खासगी कंपनीतील कर्मचारी असल्याची माहिती मिळत आहे. पोलिसांकडून मृतांची ओळख पटवण्याचे काम सुरू करण्यात आले आहे.

अपघातानंतर घटनास्थळी वाहतूककोंडी झाली होती. दुर्घटनेची माहिती मिळताच महामार्ग पोलिसांनी तात्काळ धाव घेतली आणि वाहतूक सुरळीत करण्यात आली आहे. पोलीस सूत्रांकडून मिळालेल्या माहितीनुसार, क्रुझर गाडीमधून हे ३ कर्मचारी प्रवास करत होते. यावेळी अचानक गाडीचा टायर फुटला आणि रस्ता दुभाजक ओलांडून ही गाडी समोरून येणाऱ्या ट्रकला धडकली. या गंभीर अपघातात क्रुझरमधील चालकासह तिघेजण जागीच मृत्यू पावलेत. अपघातात मृत्यू पावलेल्यांची ओळख अद्याप पटलेली नाही. पोलिसांकडून या अपघाताची नोंद करण्यात आली आहे.