फैय्याज शेख 
जव्हार (पालघर) : पालघर जिल्ह्यात जोरदार पाऊस झाला आहे. अतिवृष्टीमुळे वावर वांगणी ग्रामपंचायत हद्दीतील मुख्य रस्त्या खचल्याने रहदारीचा मार्ग पुर्णपणे बंद झाले आहेत. रूग्णालयात किंवा कामानिमित्ताने जव्हारकडे येणारा मार्ग बंद झाल्याने नागरिकांबरोबर विद्यार्थ्यांचे देखील नुकसान होत आहे. तर पिंपळशेत ग्रामपंचायत हद्दीत खरोंडा गावाचा देखील संपर्क तुटला आहे. 

पालघर जिल्ह्यात पावसाचा रेड अलर्ट देण्यात आला होता. त्या मुळे जव्हार तालुक्यात देखील मुसळधार पाऊस पडल्याने अनेक ठिकाणी पडझड झाली. जव्हार तालुक्यातील जव्हार ते वावर वांगणी गावाकडे जाणारा रस्ता रात्री खचल्याने या मार्गावरील रहदारी पुर्णपणे बंद झाली आहे. रस्त्याला एक ते दोन फुट उंच व ५० फुट लांब भेगा पडल्याने वाहतूक बंद झाली. यामुळे नागरिकांना जव्हार रूग्णालयात तसेच विद्यार्थ्यांना आश्रमशाळा, काॅलेजला येत नसल्याने विद्यार्थ्यांचा शैक्षणिक नुकसान होणार आहे.  
 

खरोंडा गावाचा संपर्क तुटला

जव्हार तालुक्यात सोमवार पासून पावसाची संततधार सुरू आहे, दरम्यान 193 मिमी पावसाची नोंद करण्यात आली आहे. जव्हार तालुक्यातील अतिदुर्गम भागातील पिंपळशेत ग्रामपंचायत हद्दीत खरोंडा गावातील पूल दोन वर्षापूर्वी महापुराने पाण्यात वाहून गेला होता. यंदा हा पूल सुरू होईल अशी आशा ग्रामस्थांना होती. मात्र यावर्षीही पुलाचे काम अपूर्ण राहिले होते. दरम्यान काल झालेल्या पावसात हा पूल पुन्हा वाहून गेला असून हजारो नागरिक संपर्क क्षेत्राच्या बाहेर झाले आहेत.

पर्यायी मार्गही पाण्याखाली 

खरोंडा गावातील लोकांना रेशनिंग आणायला ६ ते ७ कि.मी. अंतरावरून पुलावरून मार्गक्रमण करावे लागते. वाहून गेलेल्या पुलामुळे रेशनिंग कुटुंबदारांचे हाल होणार आहेत. तसेच पिंपळशेत बाजूने दुसरा पूल आहे. परंतु तो पूल देखील कमी उंचीचा असल्याने सतत पाण्याखाली बुडून ग्रामस्थांचे हाल होतात. दरम्यान जि. प. शाळा. हेदीचापाडा शाळेतील ८० टक्के विद्यार्थ्यांची संख्या हि खरोंडा गावातील आहे. बाजूच्या गावातील विद्यार्थ्यांनी खरोंडा येथे शाळेत जायचं कसे? असा प्रश्न पडला आहे.