भरत मोहळकर, साम टीव्ही, प्रतिनिधी

मराठा समाजाला ओबीसीतून आरक्षण देण्यास विरोध दर्शवत ओबीसी नेते लक्ष्मण हाकेंनी उपोषण सुरु केलंय. आमरण उपोषणामुळे हाकेंची प्रकृती ढासळली आणि राज्यात ओबीसींच्या संतापाचा भडका उडाला. त्यातच ओबीसींचं आंदोलन सरकार पुरस्कृत असल्याचा गंभीर आरोप मनोज जरांगे पाटलांनी केलाय. तर त्याला उपोषणाला बसलेले ओबीसी आंदोलक लक्ष्मण हाकेंनी जोरदार प्रत्युत्तर दिलंय.

मनोज जरांगे पाटील म्हणाले आहेत की, सरकारची कोंडी झाली नाही तर त्यांनीच आंदोलन पुरस्कृत केलं आहे. तर यावर लक्ष्मण हाके म्हणाले की, सरकार पुरस्कृत आंदोलन कसं असतं माहिती नाही.

एकीकडे सगे-सोयऱ्यांवर तोडगा काढण्यासाठी सरकारने 1 महिन्याची मुदत मागून मनोज जरांगेंचं उपोषण सोडवलं. मात्र दुसऱ्या बाजूला सरकारने दिलेले 57 लाख कुणबी प्रमाणपत्र रद्द करण्याची मागणी ओबीसी आंदोलक लक्ष्मण हाकेंनी केलीय. त्यामुळे सरकारची चांगलीच कोंडी झालीय. मराठवाड्यात ओबीसी समाज आक्रमक झाला असून रास्तारोको आणि जाळपोळीच्या घटना सुरू आहेत. लक्ष्मण हाकेंनी आंदोलकांना शांततेचे आवाहन केलंय. ते म्हणाले आहेत की, प्लीज कुणीही कायदा हातात घेऊ नये.

मराठा आणि ओबीसी आंदोलकांच्या परस्परविरोधी मागण्यांमुळे सरकारची इकडे आड तिकडे विहीर अशी अवस्था झालीय. त्यामुळे भडकलेलं आंदोलन शमवण्यासाठी सरकार कसा मार्ग काढणार ? हे पाहणं महत्वाचं ठरणार आहे.