मनोज जरांगेंनी ओबीसीतून आरक्षणाची मागणी लावून धरल्याने राजकीय वातावरण चांगलंच तापलंय.. त्यातच आता ओबीसी नेत्यांनी बैठक घेऊन एकजूट दाखवलीय. आरक्षणाला धक्का लागल्यास लाखोंच्या संख्येनं ओबीसी मुंबईत ध़डकणार असल्याचा इशारा ओबीसी नेत्यांनी दिलाय.

खरंतर मनोज जरांगेंनी मराठा आणि कुणबी एकच असल्याचा दाखला देणारं हैदराबाद गॅझेट लागू करण्याची मागणी केलीय. तर उच्च न्यायालय आणि सुप्रीम कोर्टातील निर्णयामुळे सरकारसमोरचा पेच वाढलाय. दरम्यान सरकार जरांगेंच्या दबावाला बळी पडण्याची शक्यता असल्याने ओबीसी आरक्षण वाचवण्यासाठी मंत्री छगन भुजबळ अॅक्टिव्ह झालेत. तर भुजबळांनी उपोषणाला उपोषणाने उत्तर देत ओबीसीत वाटेकरी नको, अशी थेट भूमिका भुजबळांनी घेतलीय.

मंत्री छगन भुजबळांनी आता ओबीसी आरक्षण वाचवण्यासाठी उपोषण आणि मोर्चाची हाक दिल्याने राज्यात मराठा विरुद्ध ओबीसी संघर्ष अटळ आहे... मात्र सरकारने गावखेड्यातील सामाजिक वीण विसकटू नये, यासाठी उपाययोजना करायला हव्यात.