तबरेझ शेख, साम टीव्ही

नाशिक : प्राचार्याकडून विद्यार्थिनीचा विनयभंग करण्यात आल्याचा प्रकार उघडकीस आला आहे. या प्रकारानंतर संबंधित नर्सिंग कॉलेजच्या इतर विद्यार्थिनीसह पालकांनी घडलेल्या घटनेबाबत कॉलेज प्रशासनाकडे चौकशीसाठी गेले. त्यानंतर त्यांनी असा कुठलाही प्रकार झाला नसल्याचे उत्तर दिले. यामुळे विद्यार्थिनींनी संतप्त होत संपूर्ण व्यवस्थापकीय मंडळ बदलण्याची मागणी केली. त्यामुळे कॉलेज आवारात काही वेळ तणावाची परिस्थिती निर्माण झाली होती.

नाशिकच्या द्वारका भागातील एका नर्सिंग कॉलेजच्या विद्यार्थिनीचा कॉलेजच्या प्राचार्याकडून विनयभंग करण्यात आला होता. पीडित विद्यार्थिनींच्या तक्रारीवरून शुक्रवार भद्रकाली पोलिस ठाण्यात प्राचार्य प्रवीण रमेश घोलप (वय ४०) याच्यावर चार गुन्हे दाखल करून त्यांना अटक करण्यात आली आहे. आज आठवड्याच्या पहिल्या दिवशी विद्यार्थिनींनी आणि पालकांनी कॉलेजच्या आवारात जमा झाले. कॉलेजच्या व्यवस्थापनाशी भेट घेत घटनेची चौकशी केली. असा कुठल्याही प्रकार झाला नसून बदनाम करण्यासाठी खोट्या बातम्या प्रसारित होत असल्याचे त्यांनी पालकांना उत्तर दिले.

विद्यार्थिनींनी संतप्त होत कॉलेज आवारात गोंधळ घातला. पालकांनीही व्यवस्थापकीय कामकाजाचा निषेध व्यक्त केला. भविष्यात अशा घटनांची पुनरावृत्ती होऊ नये. यासाठी कॉलेज प्रशासनाने संपूर्ण व्यवस्थापकीय मंडळ बदलण्याची मागणी केली. संशयित प्राचार्यांना पुन्हा नोकरीत घेणार नाही, असे आश्वासन प्रशासनाने दिले. विद्यार्थिनी आणि पालक मात्र संपूर्ण व्यवस्थापकीय मंडळ बदलण्याच्या मागणीवर ठाम राहिले.

काही वेळ परिसरात तणावाचे वातावरण निर्माण झाले होते. पोलिसांनी घटनास्थळी दाखल होत. त्यांची समजूत काढली. त्यानंतर पालक आणि विद्यार्थिनी कॉलेजमधून काढता पाय घेतला. घडलेल्या घटनेबाबत न्याय मिळावा आणि व्यवस्थापकीय मंडळ बदलण्याची मागणी तसेच संबंधितांवर योग्य ती कारवाई करावी. यासाठी जिल्हाधिकारी आणि संबंधित विभागाच्या कुलगुरूंची भेट घेणाऱ्या पालक आणि विद्यार्थिनींकडून सांगण्यात आले. सोमवारी कॉलेज बंद ठेवण्याची नामुष्की यामुळे ओढवली.