Chandrapur News : चंद्रपूर शहराची जलवाहिनी इरई नदीमध्ये प्रदूषित पाणी सोडण्यात आल्याने चंद्रपूर शहराचा पाणीपुरवठा बंद करण्यात आला आहे. या प्रकारामुळे चंद्रपूर जिल्ह्यातील प्रदूषणाची भीषणता पुन्हा एकदा उघड झाली आहे. (Maharashtra News)

गेल्या 2 दिवसांपासून इरई नदीत मोठ्या प्रमाणात प्रदूषित पाणी येत असल्याने चंद्रपूर महापालिकेने दाताळा येथील इंटेक वेल बंद केली. त्यामुळे चंद्रपूर शहरातील 40 टक्के भागाचा पाणीपुरवठा बुधवारपासून बंद आहे. या दूषित पाण्यामुळे इरई नदीचे पाणी अतिशय प्रदूषित (Erai River Water Polluted) झाल्याने ते स्वच्छ करणे शक्य नाही. यामुळे पाणीपुरवठा बंद केल्याची माहिती मनपा आयुक्तांनी साम टीव्हीशी बाेलताना दिली.

दुसरीकडे इरईमध्ये सोडण्यात आलेले प्रदूषित पाणी चंद्रपूर थर्मल पॉवर स्टेशनने सोडल्याचा आरोप सामाजिक कार्यकर्ते राजेश बेले यांनी केला आहे. नदीमध्ये ज्यांनी हे दूषित पाणी सोडले त्यांच्यावर फौजदारी कारवाई व्हावी अशी मागणी देखील केली जात आहे.

बेले यांच्या आरोपांची शहानिशा करण्यासाठी महाराष्ट्र प्रदूषण नियंत्रण महामंडळाच्या अधिकाऱ्यांनी आज (गुरुवार) घटनास्थळ गाठत तपास सुरू केला आहे. याबाबत उमाशंकर बादुले (प्रदूषण नियंत्रण अधिकारी, चंद्रपूर) म्हणाले पाण्याचे नमुने प्रयोगशाळेत पाठवले आहेत.

Edited By : Siddharth Latkar