Maharashtra Politics: राज्याच्या राजकारणात आज मोठी घटना घडली आहे. राष्ट्रवादीत मोठी फूट पाडून विरोधी पक्षनेते असलेल्या अजित पवारांनी थेट उपमुख्यमंत्रिपदाची शपथ घेऊन सत्तेत प्रवेश केला.

अजित पवारांच्या या बंडानंतर राष्ट्रवादी कार्यकर्ते आक्रमक झाले आहेत. अजित पवार आणि त्यांच्यासोबत बंडात सामील असलेल्या नेत्यांच्या फोटोना कार्यकर्त्यांनी राज्यभरात काळ फासायला सुरुवात केली आहे.

आज राष्ट्रवादी कार्यालयामध्ये बंडखोर नेत्यांच्या बॅनरला काळं फासण्यात आलं आहे. अजित पवारांसोबत ज्या नऊ मंत्र्यांनी शपथ घेतली त्यांच्या बॅनरवरील फोटोंना आक्रमक कार्यकर्त्यांनी काळं फासलं. (Latest Marathi News)

आव्हाडांनी बंडखोरांच्या फोटोला फासलेलं काळं पुसलं

राष्ट्रवादी कार्यालयात बंडखोर नेत्यांचे लागलेले फोटो काढून त्यावर कार्यकर्त्यांनी काळं फासलं होतं. यानंतर मात्र नुकतेच विरोधी पक्षनेतेपदी नियुक्ती करण्यात आलेले राष्ट्रवादीचे आमदार जितेंद्र आव्हाड यांनी स्वतः काळं फासण्यात आलेले फोटो पुसले.

यावेळी ते म्हणाले होते की, ही शरद पवार यांची ही शिकवण नाही. म्हणून आम्ही असं कुठलंही कृत्य करणार नाही. आम्ही अजूनही त्यांच्या संपर्कात आहोत. लवकरच परिस्थिती आधी सारखी होईल, असं ते म्हटले होते. यातच आक्रमक कार्यकर्त्यांना सांभाळण्याचं काम वरिष्ठ नेते करताना पाहायला मिळत आहे.