भोंदू अशोक खरात प्रकरणात गेल्या काही दिवसांपासून एका पाठोपाठ खळबळजनक माहिती समोर येत आहे. गेल्या दोन आठवड्यांपासून पोलिसांकडून खरातची कसून चौकशी सुरू येत आहे. शेकडो महिलांचं शोषण करणाऱ्या खरातला आज गुरुवारी सुनावणीसाठी कोर्टात हजर करण्यात आलं. यावेळी तपास अधिकाऱ्यांनी कोर्टात कागदपत्रे आणि लॅपटॉप देखील आणला. भोंदू खरात हा लॅपटॉप समोर ठेवून महिलांवर लैंगिक अत्याचार करायचा, असा संशय व्यक्त केला. भोंदू खरातने ७ महिन्यांच्या गरोदर महिलेला देखील सोडले नसल्याचे धक्कादायक माहिती अधिकाऱ्यांनी कोर्टात सांगितली.

भोंदू खरातला आज गुरुवारी कोर्टात हजर केले. त्याला तिसऱ्या गुन्ह्यात ५ दिवसांची पोलीस कोठडी सुनावण्यात आली आहे. यावेळी कोर्टात सरकारी वकील, तपास अधिकारी, आरोपीचे वकील होते. न्यायमूर्ती बी एन इचपुराणिक यांच्या समोर सुनावणी झाली. तपास अधिकाऱ्यांनी कागदपत्रे आणि सोबत लॅपटॉप आणला होता. यावेळी तपास अधिकाऱ्यांनी महत्वाचे पुरावे सादर केले.

तपास अधिकाऱ्यांनी कोर्टाकडे अशोक खरातची ७ दिवसांची कोठडी मागितली. परंतु कोर्टाने खरातला ५ दिवसांची पोलीस कोठडी दिली. खरातने 7 महिन्यांच्या गरोदर महिलेवर लैंगिक अत्याचार केल्याचे उघड झालं आहे. त्याने सातव्या महिन्यात नजर लागते म्हणून विशिष्ट विधी करावा लागतो असे सांगितले. त्याने महिलेला गुंगीचे औषध देऊन अत्याचार केला. तसेच बाजारातील चिंचोके पॉलिश करून लाखों रुपयांना विकले. विधी करत असताना नकली साप, नाग, वाघाचे कातडे दाखवण्यात आले.

नकली साप, नाग, वाघाचे कातडे हे कुठून आणले, याचा तपास हा अधिकाऱ्यांना करायचा आहे. त्याचबरोबर नकली खडे त्याने कोणाकडून घेतले, याचा तपास देखील करायचा आहे. लैंगिक अत्याचार करताना त्याने लॅपटॉपसमोर ठेवून व्हिडिओ काढल्याचा संशय आहे. खरातच्या गुन्ह्याची व्याप्ती मोठी आहे. आरोपी हुशार आणि चाणाक्ष आहे. आरोपी खरात तपासात सहकार्य करत नाही, असेही अधिकाऱ्यांनी कोर्टात सांगितले.