सचिन बनसोडे, प्रतिनिधी...

Nashik News: मनसे विद्यार्थी सेनेचे अध्यक्ष अमित ठाकरे हे सध्या नाशिक आणि नगरच्या दौऱ्यावर आहेत. अमित ठाकरे यांच्या या दौऱ्यावेळी सिन्नर येथील टोल नाक्यावर गाडी अडवल्याचा प्रकार घडला. त्यानंतर संतप्त मनसैनिकांनी टोलनाकाच फोडला. या घटनेनंतर टोलनाक्यावर काही काळ तणावाचे वातावरण निर्माण झाले. याबाबत आता अमित ठाकरे यांनी सविस्तर खुलासा केला आहे..

काय म्हणाले अमित ठाकरे...

"शिर्डीत (Shirdi) साईबाबांच्या दर्शनानंतर वैयक्तिक कामासाठी समृद्धी महामार्गाने (Samruddhi Mahamarg) नाशिकला निघालो होतो. महासंपर्क अभियानाच्या दौऱ्यात पोलीस बांधव थकल्याने मी त्यांना शिर्डीच्या शासकीय विश्रामगृहात विश्रांती करण्यास सांगितले. यावेळी टोलनाक्यावर फास्टटॅगमधून टोल कट न झाल्याने दहा ते पंधरा मिनिटं टोल कर्मचाऱ्यांनी गाडी थांबवली."

"आम्ही त्यांना टेक्निकल इशू बाबत सांगितलं मात्र कर्मचारी उद्धट भाषा वापरत होते. माझ्या सहकाऱ्यांनी त्यांना सांगितलं की हे अमित ठाकरे (Amit Thackeray) आहेत. त्यानंतर कर्मचाऱ्यांनी व्यवस्थापकाला देखील फोन लावला. मात्र व्यवस्थापक देखील उद्धट भाषा वापरत होता. पंधरा ते वीस मिनिट गाडी थांबवून ठेवली आणि नंतर सोडली."

सिन्नर येथील मनसेच्या (MNS) पदाधिकाऱ्यांना समजल्यानंतर त्यांनी टोल नाका फोडला. मला नाशिकला पोहोचल्यावर कळलं की कार्यकर्त्यांनी टोल फोडला." असे अमित ठाकरे यांनी सांगितले. तसेच यावेळी पुढे बोलताना "राज साहेबांमुळे 65 टोल बंद झाले आणि माझ्यामुळे त्यात आणखी एकाची भर पडली. टोल कर्मचाऱ्यांनी उद्धट भाषा वापरल्यामुळे कार्यकर्त्यांनी टोल फोडला..." असे स्पष्टिकरण अमित ठाकरे यांनी दिले. (Latest Marathi News)