अजय सोनावणे

नाशिक : नाशिकमधील येवलामध्ये नाशिक जिल्हा मध्यवर्ती बँकेच्या भिंतीला भगदाड पाडून दरोडा टाकल्याची घटना समोर आली आहे. मात्र सुदैवाने दरोडेखोरांच्या हाती काहीही लागलं नाही. पोलिसांनी घटनेची दखल घेत आता दरोडेखोरांचा शोध सुरु केला आहे.

नाशिक जिल्हा मध्यवर्ती बँकेच्या भिंतीला भलं मोठ भगदाड पाडून लुटण्याचा प्रयत्न चोरट्यांनी केला आहे. रोकड लुटण्याच्या उद्देशाने बँकेत घुसलेल्या चोरट्यांना बँकेत कुठलीही रोकड हाती लागली नाही. त्यामुळे चोरट्यांवर रिकाम्या हाताने परत जाण्याची वेळ आली. (Nashik News)

नाशिकच्या येवला तालुक्यातील जळगाव-नेऊर येथील नाशिक जिल्हा मध्यवर्ती बँकेत ही घटना घडली. सकाळी बँक उघल्यावर बँकेच्या कर्मचाऱ्यांच्या हा सगळा प्रकार लक्षात आला. मात्र बँकेत रोकडच नसल्याने त्यांनी सुटकेचा निश्वास टाकला.

पोलिसांना याची माहिती मिळाल्यानंतर त्यांनी घटनास्थळी येत पंचनामा केला. त्यानंतर बँकेचे कामकाज सुरळीत पणे सुरु झाले. मात्र बँकेत रोकड असती तर काय झालं असतं? असा प्रश्न गावकऱ्यांना पडला असून चोरट्यांचा तातडीने शोध घेण्यात यावा अशी मागणी गावकऱ्यांनी केली आहे. पोलीस प्रकरणाचा कसून तपास करत आहेत.