नाशिक : नाशिक (Nashik) शहरातील एका वस्तीमधून एक धक्कादायक घटना उघडकीस आली. मध्यरात्री वस्तीत शिरलेल्या एका बिबट्याने कुत्र्यावर अचानक हल्ला (Leopard Attack) चढवला. ही थरारक घटना सीसीटीव्हीत कैद झाली असून या घटनेनंतर परिसरात मोठी खळबळ उडाली. एएनआय या वृत्तसंस्थेनं या घटनेचा व्हिडिओ ट्विट केला असून आतापर्यंत 20 हजारांहून अधिक लोकांना हा व्हिडिओ बघितला आहे. (Nashik Leopard Attack Dog Viral Video)

व्हिडिओमध्ये काय आहे?

33 सेकंदाचा या व्हायरल व्हिडिओत रात्रीच्या वेळी एक पाळीव कुत्रा अंगणातील कठड्यावर बसलेला दिसत आहेत. काही सेकंदात एक बिबट्या दबा धरून तिथे येतो. या बिबट्याला पाहताच कुत्रा जोरात भुंकतो आणि पळण्याचा प्रयत्न करतो. यावेळी बिबट्या काही वेळासाठी मागे जातो आणि कुत्रा अंगणात येताच त्याच्यावर हल्ला करतो. काही वेळाने बिबट्या कुत्र्याची शिकार करुन त्याला जबड्यात पकडून पळून जाताना दिसत आहे.

दरम्यान, या संपूर्ण थरारक घटनेचा व्हिडिओ व्हायरल होताच. नाशिक परिसरात मोठी खळबळ उडाली आहे. या बिबट्याचा बंदोबस्त करावा अशी मागणी परिसरातील नागरिकांनी केली आहे. सध्या या बिबट्याचा शोध सुरू असून या घटनेनंतर नागरिकांनी मध्यरात्री घराबाहेर पडू नये असं आवाहन वनविभागाकडून करण्यात आलं आहे.

Edited By - Satish Daud