चारित्र्याच्या संशयावरून पतीनं १९ वर्षीय गर्भवती पत्नीची हत्या केल्याची धक्कादायक घटना उघडकीस आलीय. प्रकरण उघडकीस येऊ नये म्हणून पतीनं पत्नी हरवली असल्याची तक्रार पोलीस ठाण्यात दाखल केली होती. मात्र, पोलीस तपासात पतीचे बिंग फुटले. ही संतापजनक घटना नाशिकमध्ये घडली असून, परिसरात खळबळ उडाली आहे.

पोलिसांनी दिलेल्या माहितीनुसार, मृत अमृताकुमार आणि आरोपी पती विकीरॉय हे सातपूर परिसरात राहतात. पती बिगारी कामगार आहे. तो पत्नीच्या चारित्र्यावर संशय घ्यायचा. नवऱ्याची आर्थिक बाजू सक्षम नसल्यामुळे आणि महिला गरोदर असल्यामुळे ती आपल्या वडिलांकडून पैसे आणायची. या गोष्टीवरून त्यांच्यात कायम वाद व्हायचा.

२८ फेब्रवारीच्या आधी त्याने पत्नीला गंगापूर रोडलगत असलेल्या शहीद अरुण चित्ते पुलाजवळ नेत तिचा गळा आवळला. ज्यात पत्नीनं तिथेच प्राण सोडले. प्रकरण उघडकीस येऊ नये म्हणून नवऱ्यानं पोलीस ठाण्यात जात पत्नी हरवली असल्याची तक्रार दाखल केली होती. गंगापूर रोडवरील आसाराम बापू आश्रमासमोरील नदीपात्रालगत झाडाझुडपात मंगळवारी एका महिलेचा कुजलेल्या अवस्थेत मृतदेह आढळून आला होता.

नाशिक तालुका पोलिसांनी मृतदेहाचे फोटो शहर आणि ग्रामीण पोलिसांना पाठवले. त्यामुळे वर्णन पंचवटी पोलीस ठाण्यात बेपत्ता नोंद असलेल्या महिलेशी जुळले. मृतदेहावरील कपडे आणि टॅटू पाहून मृतदेह पत्नीचा असल्याचं पतीनं सांगितलं. पोलिसांनी कसून चौकशी केली असता, पतीने पत्नीची गळा आवळून हत्या केली असल्याचं कबूल केलं. पोलिसांनी आरोपीला अटक केली असून, तीन दिवसांची पोलीस कोठडी सुनावण्यात आली आहे.