तबरेज शेख 
नाशिक : दारूचे व्यसन असल्याने रोज दारू पिऊन धिंगाणा घालण्याचा प्रकार सुरु होता. यात दारू पिण्यासाठी पैसे मागितले असता कुटुंबीयांनी पैसे देण्यास नकार दिला. पैसे न दिल्याच्या रागातून राहत्या घरावर पेट्रोल टाकून पेटवून दिल्याचा धक्कादायक प्रकार नाशिकच्या उत्तमनगर परिसरातील भगवती चौकात घडला आहे. या घटनेने खळबळ उडाली आहे.   

नाशिक शहराच्या उत्तम नगर परिसरातील भगवती चौकात हा प्रकार घडला आहे. सुरेश काळे असं स्वतःचे घर पेटवून देणाऱ्या संशयीत व्यक्तीचे नाव आहे. सुरेश काळे हा त्यांच्या दुमजली घराच्या तळमजल्यावर संशयित एकटा राहतो. दरम्यान काल दुपारी त्याने वरच्या मजल्यावर जाऊन कुटुंबीयांकडे दारू पिण्यासाठी पैसे मागितले. त्यास कुटुंबीयांनी नकार दिला. यात काही एक न बोलता रागाच्या भरात सुरेश निघून गेला. 

आग लावल्यावर घर बंद करून पसार 

खाली उतरून त्याने घरासमोर उभ्या असलेल्या एका दुचाकीमधून पेट्रोल काढून आणले. यानंतर त्याने तळमजल्यावरील घरात जाऊन पेट्रोल ओतून देत घर पेटविले. इतकेच नाही तर त्याने खोलीला बाहेरून कुलूप लावून पसार झाला होता. घरातून बाहेर धूर येत असल्याचे दिसून आल्याने धावपळ उडाली होती. कुटुंबियांसह परिसरातील नागरिकांनी आग विझविण्याचा प्रयत्न केला. तसेच तातडीने पोलिस व अग्निशमन दलाला माहिती कळविली. 

काळे यास पोलिसांनी घेतले ताब्यात 

माहिती मिळताच सिडको अग्निशमन केंद्राच्या जवानांनी धाव घेत तातडीने पाण्याचा मारा करत आग विझविली. तोपर्यंत घरातील संसारपयोगी वस्तू या आगीत बेचिराख झाल्या होत्या. याबाबत काळे यांचे नातेवाईक असलेले संतोष काळे यांनी अंबड पोलीस ठाण्यात तक्रार दाखल केली होती. दरम्यान याप्रकरणी अंबड पोलिसांनी सुरेश काळे याला अटक केली आहे.