नाशिकमध्ये एका बहुराष्ट्रीय कंपनीत कर्मचारी महिलांवर झालेला अत्याचार आणि धर्मांतर प्रकरण ताजे असतानाच पुन्हा एकदा धक्कादायक घटना घडली आहे. अल्पवयीन विद्यार्थिनीवर कोचिंग क्लासमध्येच लैंगिक अत्याचार झाल्याचे उघडकीस आले आहे. या घटनेने शहरात संतापाची लाट उसळली आहे. पखाल रोड परिसरातील एका खासगी कोचिंग क्लासमध्ये हा प्रकार घडला असून, क्लासचालक महिलेच्या मदतीने तिच्याच भाच्याने विद्यार्थिनीवर वारंवार अत्याचार केल्याचे समोर आले आहे. पोलिसांनी तक्रारीची दखल घेत तात्काळ गुन्हा नोंदवला आणि तपास सुरू केला.

मिळालेल्या माहितीनुसार, पीडित विद्यार्थिनी दहावीची असून ती नियमितपणे पखाल रोडवरील ‘कसक पार्क’ येथे क्लाससाठी जात होती. जुलै २०२४ ते नोव्हेंबर २०२५ या कालावधीत तिच्यासोबत अश्लील प्रकार सुरू होता. क्लासचालक राशेदा शेख हिने विविध कारणे सांगत विद्यार्थिनीला घरातील बेडरूममध्ये पाठवले, जिथे तिचा भाचा सिबतेन याने तिच्यावर वारंवार लैंगिक अत्याचार केला.

या घटनेदरम्यान पीडितेला धमकावून गप्प बसवण्याचा प्रयत्न करण्यात आला. ही बाब कुणालाही सांगितल्यास गंभीर परिणाम भोगावे लागतील अशी भीती दाखवण्यात आली. तसेच धमकी देत तिचा आवाज दाबण्याचा प्रयत्न झाला. मात्र, सततच्या मानसिक आणि शारीरिक त्रासाला कंटाळून अखेर विद्यार्थिनीने धैर्य दाखवत मुंबई नाका पोलिस ठाण्यात तक्रार दाखल केली.

या प्रकरणी मुंबई नाका पोलिसांनी क्लासचालक महिला आणि तिच्या भाच्याविरोधात बलात्कार तसेच पोक्सो कायद्यांतर्गत गंभीर गुन्हा दाखल केला आहे. मात्र, गुन्हा दाखल होताच दोन्ही संशयित फरार झाले असून पोलिस त्यांचा शोध घेत आहेत. या प्रकरणाचा तपास पोलिस उपनिरीक्षक मुस्तफा शेख यांच्याकडे सोपवण्यात आला आहे.

या घटनेमुळे खासगी क्लासेसमधील सुरक्षिततेचा मुद्दा पुन्हा एकदा ऐरणीवर आला आहे. नाशिकमधील ही घटना केवळ एक गुन्हा नसून समाजासाठी गंभीर इशारा मानला जात आहे. अशा प्रकारांना आळा घालण्यासाठी प्रशासनाने कठोर पावले उचलण्याची आणि कोचिंग क्लासेसवर अधिक कडक देखरेख ठेवण्याची मागणी नागरिकांकडून होत आहे.