नाशिकमध्ये नवरा-बायकोने आयुष्य संपवल्याची धक्कादायक घटना समोर आली आहे. नाशिकच्या घोटा परिसरात ही घटना घडली आहे. धावत्या ट्रेनसमोर उडी मारून दोघांनी आत्महत्या केली. या घटनेमुळे नाशिकमध्ये खळबळ उडाली आहे. या प्रकरणाचा तपाल नाशिकच्या घोटी पोलिसांकडून सुरू आहे.

मिळालेल्या माहितीनुसार, नाशिकच्या घोटी परिसरातील रेल्वे लाईनमध्ये राहणाऱ्या एका दाम्पत्यानी बुधवारी आत्महत्या केली. दोघांनी धावत्या ट्रेनसमोर उडी मारून आयुष्य संपवलं. दिनेश सावंत (३८ वर्षे) आणि त्यांची बायको भाग्यश्री सावंत (३३ वर्षे ) अशी आत्महत्या केलेल्या नवरा-बायकोची नावं आहेत. दोघांचे २०१३ मध्ये लग्न झाले होते.

दिनेश आणि भाग्यश्री यांनी ११ वर्षे सुखी संसार केला. सुधानगर घोटी परिसरात राहणाऱ्या दिनेश आणि भाग्यश्री यांनी इगतपुरीच्या दिशेने जाणाऱ्या सुपरफास्ट एक्स्प्रेससमोर उडी मारून आत्महत्या केली. घटनेची माहिती मिळताच घोटी पोलिसांनी घटनास्थळी धाव घेतली. पोलिसांनी दोघांचे मृतदेह ताब्यात घेऊन शवविच्छेदनासाठी रुग्णालयात पाठवले. त्यांनी आत्महत्या का केली यामागचे कारण अद्याप समोर आले नाही. या प्रकरणी घोटी पोलिस ठाण्यात अकस्मात मृत्यूची नोंद करण्यात आली आहे. पोलिस पुढील तपास करत आहेत.