Pune Crime : पुण्यात खळबळ! वडील चिडले म्हणून १६ वर्षीय मुलानं आयुष्य संपवलं

सचिन जाधव, साम टीव्ही, प्रतिनिधी

Pune : पुण्यातून एक खळबळजनक घटना समोर आली आहे. वडील रागावल्याने एका १६ वर्षीय मुलाने स्वत:चे जीवन संपवल्याचे उघडकीस आले आहे. झाडाला गळफास घेत मुलाने आत्महत्या केल्याचे म्हटले जात आहे. पुण्याच्या राजगड तालुक्यातील विंझर धनगरवस्तीमध्ये ही घटना ५ ऑगस्ट रोजी रात्री घडली आहे.

आत्महत्या करणाऱ्या १६ वर्षीय मुलाचे नाव गणेश असे आहे. गणेशच्या वडिलांनी वेल्हे पोलीस ठाण्यात दिलेल्या तक्रारीनुसार, लहान मुलांमध्ये खेळू नको असे म्हणत ते गणेशला रागावले होते. या गोष्टीचा राग मनात धरुन गणेशने स्वत:ला संपवले. घरात कोणी नसताना त्याने गोठ्याजवळील चिंचेच्या झाडाला दोरीने गळफास घेतला.

परिवारातील सदस्यांनी गणेशला झाडाला लटकलेले पाहिले. तो बराच वेळ हालचाल करत नसल्याचे त्यांच्या लक्षात आले. त्यानंतर गणेशच्या वडिलांनी वेल्हे पोलीस ठाण्यात धाव घेतली. पोलिसांनी घटनास्थळी दाखल होत गणेशला खाली उतरवून वेल्हे ग्रामीण रुग्णालयात येथे पाठवला. डॉक्टरांनी तपासणीनंतर त्याला मृत घोषित केले. या घटनेमुळे परिसरात हळहळ व्यक्त केली जात आहे.

अशा घटना पालकांना सजग करणाऱ्या आहेत. मुलांचे वय, भावना आणि समज-गैरसमज यांचा विचार करून संवाद साधणे आवश्यक आहे. क्षुल्लक कारणांवरून आत्महत्या करणाऱ्या मुलांची संख्या वाढत असल्यामुळे समाज, शाळा आणि पालकांनी मानसिक आरोग्याकडे गांभीर्याने पाहणे अत्यावश्यक आहे. असे मत घटनेनंतर मनोविकारतज्ज्ञांनी व्यक्त केले आहे.