Pune News : पुण्यात ज्या ठिकाणी दहशत, त्याच ठिकाणी धिंड, पोलिसांनी अट्टल गुन्हेगारांना शिकवला धडा, पाहा व्हिडिओ

पुणे शहरातील सिंहगड रस्त्यावरील कोल्हेवाडी परिसरात गाडी घासल्याच्या किरकोळ कारणावरून काही तरुणांनी खुलेआम हवेत गोळीबार करत परिसरात दहशतीचे वातावरण निर्माण केल्याची धक्कादायक घटना घडली. ४ ऑगस्ट रोजी रात्रीच्या सुमारास झालेल्या या घटनेने नागरिकांमध्ये भीतीचे वातावरण निर्माण झाले होते. या घटनेनंतर संबंधित आरोपी घटनास्थळावरून फरार झाले होते.

मात्र, नांदेड सिटी पोलीस स्टेशनच्या अधिकाऱ्यांनी तात्काळ तपासाची चक्रे फिरवली आणि फक्त २४ तासांच्या आत सर्व सहा आरोपींना अटक करण्यात यश मिळवले. खडकवासला चौपाटी परिसरातून ही कारवाई करण्यात आली. आरोपींना अटक केल्यानंतर पोलिसांनी त्यांची सिंहगड रोड परिसरातून धिंड काढत गुन्हेगारी प्रवृत्तीविरुद्ध कडक संदेश दिला.

साहिल अरविंद चव्हाण (वय २४, रा. सप्तगिरी हाईट्स, खडकवासला, पुणे), अभिजीत राजू चव्हाण (वय ३१, रा. तिरुमल हाईट्स, कोल्हेवाडी, पुणे), प्रशांत यशवंत चव्हाण (वय ३४, रा. सप्तगिरी हाईट्स, लमाणवाडी, खडकवासला, पुणे), आकाश भिमा चव्हाण (वय २४, रा. तिरुमल हाईट्स, खडकवासला, पुणे), गितेश शंकर जाधव (वय २०, रा. नानाजी व्हिलाच्या मागे, खडकवासला, पुणे), मंदार यशवंत चव्हाण (वय ३९, रा. सप्तगिरी हाईट्स, लमाणवाडी, खडकवासला, पुणे) अशी अटक करण्यात आलेल्या सहा आरोपींची नावे आहेत.

या प्रकरणी संबंधितांवर विविध गंभीर कलमांअंतर्गत गुन्हे दाखल करण्यात आले असून, पोलिसांकडून पुढील तपास सुरू आहे. पोलिसांनी वेळेत केलेल्या या जलद कारवाईमुळे स्थानिकांमध्ये समाधानाचे वातावरण आहे. शहरात कायदा-सुव्यवस्था राखण्यासाठी पोलिसांची तात्काळ कृती ही अत्यंत महत्त्वाची असून, अशा गुन्हेगारी प्रवृत्तींना पाठीशी घालणार नाही, असा स्पष्ट संदेश या कारवाईतून दिला गेला आहे.