अभिजित सोनावणे, नाशिक

Nashik Igatpuri School Teacher Physically Assault on 9 years Girl शिक्षकांच्या हाती विद्यार्थ्यांचं भविष्य, सुरक्षितता आणि संस्कार असतात मात्र याच शिक्षकीपेशाला काळिमा फासणारी घटना घडली आहे. नाशिकच्या इगतपुरीमध्ये ५५ वर्षीय शिक्षकाने खाऊचे आमिष दाखवून ९ वर्षीय चिमुकलीवर अत्याचार केले असल्याची संतापजनक घटना समोर आली आहे. याप्रकरणी शिक्षकाला पोलिसांनी अटक केली आहे. दरम्यान या घटनेने परिसरात खळबळ उडाली असून शिक्षकाला कठोर शिक्षा व्हावी यासाठी मागणी जोर धरू लागली आहे.

मिळालेल्या माहितीनुसार, सदर घटना इगतपुरी तालुक्यातील अडसरे बुद्रुक-कारंजवाडी येथे घडली. रामचंद्र मनाजी कचरे (वय ५५) असे आरोपी शिक्षकाचे नाव असून, तो जिल्हा परिषदेच्या शाळेत कार्यरत आहे. चॉकलेटचे आमिष, भीती आणि दमदाटीचा वापर करून कचरे हा एका निष्पाप मुलीच्या बालपणावरच घाला घालण्यात आल्याचा आरोप आहे.

या प्रकरणी मुलीने आपल्या कुटुंबियांना घडलेली हकीकत सांगितली. पीडित मुलीच्या सांगण्यावरून तिच्या कुटुंबीयांनी पोलीस ठाणे गाठले. त्यानंतर घोटी पोलिस ठाण्यात तक्रार दाखल करण्यात आली. शिवाय तपासाची चक्रे वेगाने फिरवत पोलिसांनी तत्काळ कारवाई करीत आरोपीला अटक केली.

याप्रकरणी पोलिस उपनिरीक्षक सुरेखा देवरे व तुषार ढगे तपास करीत असून, संशयिताविरुद्ध पॉक्सो कायद्यान्वये गुन्हा दाखल केला आहे. दरम्यान या प्रकरणी नराधम शिक्षकाला कठोरातील कठोर शिक्षा व्हावी अशी मागणी जोर धरू लागली आहे.