नाशिक मधून धक्कदायक बातमी समोर आली आहे. मालेगावमध्ये लहान मुलांच्या आपापसातल्या वादामुळे दोन गट आपापसात भिडले. या वादात गोळीबार झाल्याचेही माहिती मिळाली आहे. या घटनेने परिसरात भीतीचे वातावरण निर्माण झाले आहे. शिवाय या दुर्घटनेत कोणतीही जीवित हानी झाली नाही मात्र मोठ्या प्रमाणावर वित्त हानी झाली आहे.

मिळालेल्या माहितीनुसार, नाशिकच्या मालेगाव मध्ये काही लहान मुलांचा आपापसात मोठा वाद झाला. या भांडणाच्या कारणावरून कुरापत काढत मेहताब अली या तरुणाने सुमारे १० ते १२ तरुणांना सोबत घेतले. मेहताबने दोन्ही हातात पिस्तूल घेऊन लईक अहमद मोहम्मद कामील यांच्या दिशेने दोन गोळ्या झाडल्या.

सुदैवाने लईक अहमद मोहम्मद कामील खाली बसल्याने त्याचा जीव थोडक्यात वाचला. यानंतर १० ते १२ संशयित आरोपींनी त्याला लाथाबुक्यांनी जबर मारहाण केली. येवढ्यावरच न थांबता लईक याच्या घरात जबरदस्तीने घुसून घरातील वस्तूंची तोडफोड केली. यावेळी एका संशयितांने हातात दोन तलवारी घेत दहशत निर्माण करण्याचा प्रयत्न केला. एवढंच नव्हे तर घराबाहेर उभी असलेली मोटरसायकल पाडून नुकसान केलं.

या गोंधळात लईकचा मोबाईल व तब्बल ५०,००० रोख रक्कम गहाळ झाले. घटनेनंतर पोलिसांनी तत्काळ घटनास्थळी धाव घेतली असून मुख्य आरोपीसह त्याच्या साथीदारांचा शोध सुरू आहे. या प्रकरणी आयेशानगर गुन्हा दाखल करण्यात आला आहे. या घटनेने परिसरात तणावाचे वातावरण निर्माण झाले आहे.