अभिजीत सोनावणे, नाशिक

कल्याणमध्ये दोन सख्ख्या बहिणी बेपत्ता झाल्या असल्याची घटना ताजी असतानाच नाशिकमध्ये मानवी तस्करीचा संशय निर्माण करणारी धक्कादायक घटना समोर आली आहे. अवघ्या १९ वर्षांच्या तरुणीची २ लाख रुपयांत विक्री करून तिचे जबरदस्तीने लग्न लावल्याचा प्रकार उघड झाला आहे. सातपूर पोलिस ठाणे यांनी तातडीने कारवाई करत तरुणीची सुखरूप सुटका केली आहे. या घटनेने परिसरात खळबळ उडाली असून मुलींच्या सुरक्षिततेवर पुन्हा एकदा प्रश्न उपस्थित झाला आहे.

कार्बन नाका परिसरातील तरुणी घरातून बेपत्ता झाल्यानंतर तिच्या आईने तक्रार दाखल केली होती. त्यानंतर तरुणीने फोनवरून दोन महिलांनी इव्हेंटच्या कामाचे आमिष दाखवून तिला मालेगावमार्गे नांदगाव तालुक्यातील जातेगाव येथे नेऊन जबरदस्तीने लग्न लावल्याची माहिती दिली.

या प्रकरणात राणी आणि भागी नावाच्या महिलांवर संशय व्यक्त करण्यात आला असून संबंधितांविरुद्ध गुन्हा दाखल करण्याची प्रक्रिया सुरू आहे. कारवाईदरम्यान स्थानिक नागरिकांनी पोलिसांना घेराव घालत विरोध केला, मात्र अतिरिक्त कुमक मागवून अखेर तरुणीची सुटका करण्यात यश आले.

पोलिस आयुक्त संदीप कर्णिक यांच्या मार्गदर्शनाखाली या प्रकरणाचा सखोल तपास सुरू असून मानवी तस्करीच्या अनुषंगाने चौकशी केली जात आहे. नाशिकमधील या घटनेमुळे जबरदस्ती विवाह आणि मानवी तस्करीचा गंभीर मुद्दा पुन्हा एकदा ऐरणीवर आला आहे. मुलींच्या सुरक्षिततेवर प्रश्न निर्माण करण्यात आला आहे.