Narayan Rane: शिवसेना ठाकरे गटाचे खासदार संजय राऊत आणि केंद्रीय मंत्री नारायण राणे यांच्यात जोरदार आरोप प्रत्यारोप सुरूच आहेत. राऊतांनी दिलेलं ओपन चॅलेंज स्वीकारल्यावर आता राणे उद्धव ठाकरेंची भेट घेणार आहेत. संजय राऊतांविषयी काही गोष्टी सांगण्यासाठी ही भेट होत आहे. (Latest Narayan Rane News)

केंद्रीय मंत्री नारायण राणे यांनी सांगितले की, " राऊतांचे काय योगदान आहे. आजच्या राजकारणातले ते जोकर आहेत. शिव्या घालण्यापलीकडे काही करत नाहीत. काशीला आणि सारनाथला आमचा राम घेऊन चालला आहे. तिथे रामाचे कार्य चालू असताना रावणाचा उल्लेख कशाला?"

तसेच उद्धव ठाकरेंच्या भेटीवर बोलताना ते म्हणाले की, " मी उद्धव ठाकरेंना भेटून सांगणार आहे की, मी खासदार झाल्यावर संजय राऊत माझ्या बाजूला येऊन बसायचे आणि उद्धव ठाकरे आणि रश्मी ठाकरे यांच्याविषयी जे बोलायचे ते मी त्यांना सांगणार आहे. ते ऐकूण दोघांनी राऊतांना चपलेनं मारलं नायतर मला विचारा. मी आज ना उद्या माझं सर्व संरक्षण सोडणार आणि संजय राऊतांना भेटायला जाणार, " असं नारायण राणे यावेळी म्हणाले.

संजय राऊत शिवसेना वाढवण्याचे नाही तर संपवण्याचे काम करत आहेत. त्यांना मातोश्रीला सुरूंग लावायचा आहे. ज्याव्यक्तीच्या खांद्यावर त्यांचा हात असेल तो खांदा गळलाच म्हणून समजा. माझं संरक्षण सोडून मी संजय राऊत यांना भेटणार, असं म्हणत राणेंनी राऊत यांनी केलेलं चॅलेंज स्वीकारलं आहे.

काय म्हणाले होते संजय राऊत?

" शिंदे गटाला कचरा गोळा करायची सवय आहे. शिंदे गटात गेलेले सगळे चोर लफंगे आणि कचरा आहेत. कचऱ्यासमोर मुख्यमंत्री शिंदे भाषण करतात. राणे तुम्ही गुंड, तर मी महागुंड, कुठे येवू, मी कुणालाही घाबरणार नाही. कुठल्याही एजंन्सीला घाबरत नाही, " असे संजय राऊत म्हणाले होते.