सागर निकवाडे, साम टीव्ही

Nandurbar Vishal Patil Success Story: जिद्द आणि चिकाटी असली, की या जगात काहीच अशक्य नाही असं म्हटलं जातं. याचाच प्रत्यय नंदुरबार जिल्ह्यातून आला आहे. घरची परिस्थिती अत्यंत हलाकीची असताना देखील एका शेतकऱ्याच्या मुलाने कठोर परिश्रम घेत आपल्या वडिलांचं स्वप्न पूर्ण केलं आहे. (Latest Marathi News)

नंदुरबार (Nandurbar) तालुक्यातील आसाणे गावातील विशाल निंबा पाटील यांची भारतीय सैन्यदलाच्या इंजिनिअरिंग फोर्समध्ये निवड झाली आहे. या परीक्षेसाठी भारतात फक्त सातच जागा होत्या. यामध्ये विशाल पाटील हे देशात तिसऱ्या क्रमांकावर आले आहेत.

विशाल पाटील यांच्या कुटुंबाच्या शेतीवर उदरनिर्वाह होता, मात्र आसाणे गाव हे दुष्काळग्रस्त भागात मोडलं जातं. त्यामुळे पाटील यांच्या घरची परिस्थिती अत्यंत हलाकीची होती. परंतु शिक्षणाची जिद्द असल्याने आपला गाव सोडून जळगाव (Jalgaon) या ठिकाणी जाऊन शिक्षण घेतलं.

शिक्षण घेत असताना विशाल पाटील यांनी शेतीच्या कामात देखील वडिलांना मदत केली. याशिवाय कठोर परिश्रम घेत भारतीय सैन्यदलाची (Indian Army) परीक्षा दिली आणि घवघवीत यश मिळवलं. विशेष बाब म्हणजे, संपूर्ण भारतातून घेण्यात आलेल्या या इंजिनिअरिंग परीक्षेत केवळ सातच जागा होत्या.

या सात जागांमध्ये विशाल पाटील यांनी तिसरा क्रमांक पटकावला आहे. बापाने काबाड कष्ट करून शिकवलेल्या मुलाने घवघवीत यश मिळवल्यानंतर गावातील नागरिकांनी पेढे वाटत आनंद साजरा केला. विशाल पाटील यांच्या यशाचं जिल्हाभरातून कौतुक होत आहे.

Edited by - Satish Daud