सागर निकवाडे 

नंदुरबार : राज्य सरकारने महिलांसाठी लाडकी बहिण योजना सुरु केली. लाडकी बहिण योजनेचा लाभ घेण्यासाठी ई केवायसी करणे अनिवार्य आहे. त्यासाठी बँकांमध्ये मोठ्या प्रमाणात गर्दी होत आहे. मात्र आदिवासी भागात बँकांची संख्या कमी असल्याने मोठ्या रांगा लागत आहेत. ग्रामीण भागातून येऊन काम होत नसल्याने आणि दररोज येण्याजाण्यासाठी होणारा खर्च परवडणारा नसल्याने घरून भाकरी बाधून आदिवासी महिला बँकांच्या बाहेर मुकामी थांबत असल्याचे धक्कादायक वास्तव समोर आले आहे.

सरकारने एखादी योजना आणताना संपूर्ण यंत्रणा उभारावी. तसेच गावपातळीवर उपाय योजना करणे अपेक्षित (Nandurbar) आसताना आदिवासी भागातील महिलांना मोठ्या समस्यांना सामोरे जावे लागत असल्याचे वास्तव आहे. केवायसी करण्यासाठी राज्य सरकारने उपाय योजना करणे गरजेचे आहे. मात्र तसे होताना दिसून येत नसल्याने साधारण मागील महिन्यापासून बँकांमध्ये महिलांची प्रचंड गर्दी होताना दिसून येत आहे. 

लाडकी बहिण योजनेचा लाभ घेण्यासाठी खाते असलेल्या (Bank) बँकेत ई- केवायसी करावी लागत आहे. ग्रामीण भागातील अनेक महिलांनी बँकेची खाते उघडली आहेत. मात्र केवायसी नसल्याने आता केवायसी करण्यासाठी बँकांच्या बाहेर मोठ्या रांगा लागत आहे. मात्र बँकांमध्ये होणारी गर्दी मोठी असल्याने अनेकांना रिकाम्या हाताने परत जावे लागत आहे. दरम्यान दररोज येऊन परत जाने आर्थिकदृष्ट्या शक्य नसल्याने अनेक महिलांनी आणि त्यांचा नातेवाईकांनी बँकेच्या बाहेर मुकामी राहण्याचा पर्याय निवडलेला आहे.