सागर निकवाडे 

नंदूरबार : सातपुडा भागात असलेल्या नंदूरबार जिल्ह्यातील तिनसमाळ घाटात दरड कोसळली आहे. यामुळे (Nandurbar) वाहतुकीसाठी हा मार्ग बंद झाला आहे. या रस्त्याची दुरवस्था नेहमीच बिकट असते. यात आता दरड कोसळल्याने चार गावांच्या दळणवळणाचा मार्ग बंद झाला असून नागरिकांना पायपीट करावी लागत आहे. (Maharashtra News)

प्रधानमंत्री ग्रामसडक योजनेतील तिनसमाळचा रस्त्याचे काम चांगले न केल्याने ही अवस्था आहे. मागील काही दिवसांपासून गावात जाणार रस्ता बंद असल्यामुळे नागरिक पायपीट करीत आहेत. ठीक ठिकाणी दरडी कोसळून रस्ता पूर्णतः बंद झाला आहे. गावात जाणाऱ्या प्रधानमंत्री ग्रामसडक योजनेतील रस्ता तुटल्यामुळे चार गावांचा संपर्क तुटला आहे. नंदुरबार जिल्ह्यातील तिनसमाळ, बेडीपाडा, सापऱ्यापाडा आणि शेलदा अशा चार गावांना जोडणारा रस्ता बंद झाल्यामुळे नागरिकांना पायपीट करावी लागत आहे. 

मोटारसायकलही जाणे अशक्य 

गावात जेमतेम जीप जाणाऱ्या रस्त्याला शासनाने लक्ष न दिल्यामुळे आता मोटर सायकलही जाणे कठीण अशी परिस्थिती निर्माण झाली आहे.  दहा कोटी खर्च करून देखील मोटर सायकल जात नसेल तर एवढा पैसा कोठे खर्च केला असा सवाल नेमही गावकरी प्रशासनाकडे विचारत असतात.