सागर निकवाडे 
नंदुरबार : नंदुरबार शहरात किरकोळ वादातून एका युवकाला बेदम मारहाण करण्यात आली होती. यात सदर युवक गंभीर जखमी झाला असता उपचारादरम्यान त्याचा मृत्यू झाला आहे. या घटनेनंतर मात्र शहरात मोठा तणाव निर्माण झाला असून, संतप्त जमावाने आरोपींवर कठोर कारवाई करण्याची मागणी केली आहे. 

नंदुरबार शहरातील सिद्धिविनायक चौकात सदरची घटना घडली होती. यात मोहित राजपूत असे मृत्यू झालेल्या युवकाचे नाव आहे. किरकोळ कारणावरून तरुणाचा काही मुलांसोबत वाद झाला. या वादाचे रूपांतर हाणामारीत झाले. यात मोहित राजपूत हा गंभीर जखमी झाला होता. यानंतर त्याला सुरतमधील एका रुग्णालयात उपचारासाठी दाखल करण्यात आले. मात्र, दुर्दैवाने उपचारादरम्यान त्याची प्रकृती खालावली आणि त्याचा मृत्यू झाला. 

पोलिसांना घेराव घालत आरोपींच्या अटकेची मागणी 

दरम्यान मोहितच्या मृत्यूची बातमी कळताच त्याच्या परिवारावर दु:खाचा डोंगर कोसळला. मोहितचा मृतदेह घरी आणल्यावर नातेवाईक आणि मित्रमंडळींनी एकच आक्रोश केला. या घटनेमुळे संतप्त झालेल्या जमावाने शहरातील सिद्धिविनायक चौकात गर्दी केली. तसेच पोलिसांना घेराव घालून आरोपींना तात्काळ अटक करून कठोर शिक्षा देण्याची मागणी केली. त्याचबरोबर, नंदुरबार शहरात वाढलेल्या गावगुंडांचा बंदोबस्त करण्याची मागणीही त्यांनी केली.

पाच संशयितांविरुद्ध गुन्हा दाखल 
दरम्यान पोलिसांनी तातडीने पावले उचलली आहेत. शहर पोलीस ठाण्यात पाच संशयित आरोपींविरुद्ध गुन्हा दाखल करण्यात आला असून, पुढील तपास सुरू आहे. तसेच लवकरच सर्व आरोपींना पकडून योग्य ती कारवाई करू, असे आश्वासन पोलीस अधीक्षक श्रवणदत्त एस. यांनी दिले आहे. या घटनेमुळे नंदुरबार शहरात तणावाचे वातावरण निर्माण झाले आहे. पोलिसांच्या पुढील कारवाईकडे सर्वांचे लक्ष लागले आहे.