चिंचपाडा (नंदुरबार) : खांडबारा येथून दुचाकीने बाजार करून मोठे कडवान येथे परतणाऱ्या शेतकरी (Farmer) दांम्प्त्यांच्या दुचाकीला मद्यधुंद तिघा तरूणांच्या दुचाकीने मागून जोरदार धडक (Accident) दिली. यात पती-पत्नी गंभीर जखमी झाले, उपचार सुरू असताना त्यांचा मृत्‍यू झाला. (Letest Marathi News)

विसरवाडी खांडबारा रस्त्यावरील खातगाव फाट्याजवळ हा अपघात झाला. मोठे कडवान येथील शेतकरी राजेश सखाराम गावित (वय ४५) हे पत्नी इंदिरा गावित (वय ४०) यांच्‍यासह दुचाकीने खांडबारा येथून बाजार करून आपल्या शेतातील घराकडे जात होते. त्याचवेळी खातगाव येथील तिघे तरूण किरण किसन वळवी (वय १८), अमोल वळवी (वय २५), सूरज गावित (वय २२) हे दुचाकीने मद्यधुंद अवस्थेत भरधाव वेगाने येत होते.

मागून जोरदार धडक

प्रत्यक्षदर्शींनी ते भेलकांडत दुचाकी चालवित असल्याचे व मद्याच्या नशेत असल्याचे सांगितले. त्यांनी राजेश गावित यांच्या दुचाकीला मागून जोरदार धडक दिल्याने राजेश व इंदिरा गावित रस्त्याच्या कडेला फेकले गेले. यात ते गंभीर जखमी झाले. १०८ रुग्णवाहिकेवरील डॉक्टरांनी प्राथमिक उपचार करून त्यांना तातडीने नंदुरबार जिल्हा रुग्णालयात उपचारासाठी पाठविले. मात्र उपचार सुरू असतांना त्यांचा मृत्यू झाला. धडक देणारे तिघे तरूण दुचाकीवरून खाली पडल्याने गंभीर जखमी झाले आहेत. त्यांनाही पुढील उपचारासाठी जिल्हा रूग्णालयात पाठविले आहे.

कठोर कारवाईची मागणी

मृताच्या नातेवाइकांनी आक्रोश केला. त्यांच्या पश्‍चात आई, दोन मुली, एक मुलगा असा परिवार आहे. पल्सरवरील तरुणांनी शेतकरी पती-पत्नीला अपघातात जखमी करून ठार केल्याने त्यांच्यावर गुन्हा दाखल करून कठोर कारवाई करावी अशी मागणी नातेवाईक व मोठे कडवान ग्रामस्थांनी केली आहे. पोलिस चौकशी करून गुन्हा दाखल करण्याची कार्यवाही करूत असून त्यानंतर गुन्हा नोंदविला जाणार असल्याची माहिती स्थानिक पोलिसांनी दिली.